Шинэ төрлийн коронавирусын халдварын талаар мэдээлэл хийлээ.

ЭМЯ-ны Олон нийттэй харилцах, тандалт шуурхай удирдлагын хэлтсийн дарга Д.Нарангэрэл “Дэлхий дахинд коронавирусын халдвар өндөр эрчтэй тархаж байна. Ялангуяа азийн 12 орон тэр дундаа бидний хамгийн их зорчдог хөрш зэргэлдээ Япон, Сингапур, Солонос, Тайвань зэрэг орнуудад өвчлөл нэмэгдэж байна. Тиймээс бүх хүн энэ өвчнөөс урьдчилан сэргийлэх, сонор сэрэмжээ алдахгүй байх цаг үе тулгараад байна. Өчигдөр ГССҮТ-ийн эмч нар Ухань хотын эмч нарт нэг өдрийнхөө цалинг хандивласан бол өнөөдөр ууган хүнсний үйлдвэрүүд нэгдэж, компанийн 1179 ажилтан нэг өдрийн цалин буюу 39 сая төгрөгийг хандивлалаа” гэв.

Л.Ариунтуяа “Өнөөдрийн байдлаар халдварын нийт 70182 тохиолдол болж, шинээр 1158 тохиолдол, 2009 нас баралт бүртгэгдсэн байна. Сүүлийн 24 цагийн хугацаанд нас баралт 137-оор нэмэгдэж Филиппин, Франц зэрэг улсуудад гурван нас баралт бүртгэгдлээ. Мөн БНХАУ-аас гадна 25 улсад 900 гаруй тохиолдол нэмэгдсэн байна. Хятадын өвчин судлалын судалгаагаар тохиолдлын 81 хувь нь хөнгөн, 5 хувь нь нэн хүнд явцтай байна. Нас баралтын түвшин 2.3 хувьтай гэж судлагджээ. Энэ сарын 11-ний байдлаар  эрүүл мэндийн 3019 ажилтан халдвар авсан байснаас 14.6 хувь нь маш хүнд гэсэн оноштойгоор эмчлэгдэж байна” гэлээ.

Б.Лхам