Шинэ төрлийн коронавирусын халдварын талаар мэргэжлийн байгууллагуудын төлөөлөл мэдээлэл хийлээ.
ЭМЯ-ны Олон нийттэй харилцах, Тандалт, шуурхай удирдлагын газрын дарга Д.Нарангэрэл “БНХАУ-ын Ухань хотод өвчлөл гарснаас хойш анх удаа 1812 хүн эмнэлгээс эмчлэгдэж гарсан таатай мэдээлэл байна. Гэхдээ бидний хамгийн их зорчдог улсуудад ихээр нэмэгдэж байна. Тухайлбал, Япон улсад Diamond prencess хөлөг онгоцон дээр шинэ тохиолдол нэмэгдсэн. Улмаар нийт өвчлөл 651 болж нэмэгдлээ. Мөн БНСУ-д сүмд залбирал үйлдэж буй эмэгтэй өөрөөсөө гадна 10 хүнд халдвар тараасан байна. Тиймээс хүн амын нягтрал бөөгнөрөлтэй газраас зайлсхийх нь энэ халдварыг тархаахгүй байх чухал зүйл юм. ДЭМБ-аас аль болох даарахгүй байх, дулаан хувцаслах. Хоёрдугаарт, халуун шөл, шингэн зүйл хэрэглэх, дасгал хөдөлгөөн хийх, сайн унтаж амрах, стресстэхгүй байхыг зөвлөж байна” гэв.
ДЭМБ-ын мэргэжилтэн О.Ариунтуяа “Өнөөдрийн 10.00 цагийн байдлаар 75292 тохиолдол бүртгэгдэж, БНХАУ-аас гадна 1900 тохиолдол, таван нас баралт гарсан байна. Тухайлбал, Иран улсад хоёр хүн нас барсан. БНХАУ-д шинээр өвчилсан хүний тоо багасч байгаа ч бусад улсуудад халдвар дамжсан нь тодорхойгүй тохиолдлын тоо ихэсч байна. Хүн олноор цугларсан газарт халдвар тархах магадлал их байна” гэлээ.
А.Сүх