Жүдо бөхийн эрэгтэйчүүдийн 81 кг барилддаг, дэлхийн аварга Ираны тамирчин Саид Моллай өнгөрсөн оны арванхоёрдугаар сараас Монгол Улсын нэрийн өмнөөс барилдахаар болсон билээ. Тодруулбал, улс оронд нь үүссэн нөхцөл байдлын улмаас тэрбээр иргэншлээ солих хүсэлт гаргасныг Ерөнхийлөгч Х.Баттулга зөвшөөрснөөр 27 настай Саид Моллай өнгөрсөн оны арванхоёрдугаар сарын 12-14-нд БНХАУ-д болсон “World masters” тэмцээнд Монгол Улсыг төлөөлөн оролцсон нь энэ байв.
Үүнээс өмнө ДАШТ-ий дараа Олон улсын жүдо бөхийн холбооны ерөнхийлөгч Мариус Визер “Бид Саид Моллаигийн явдлыг олон нийтэд дэлгэсэн нь түүнийг болон гэр бүлийг нь хамгаалах зорилготой юм. Засгийн газрынхаа шийдвэрээр ДАШТ-д оролцож чадаагүй бусад Иран жүдочдын талаар ч бид ярих болно. Саид Моллаи өөр орны нэр дээр барилдахыг хүсвэл бид түүний чансааны оноог цуцлахгүй” гэж мэдэгдсэн байдаг.
Тэгвэл Швейцарын Лозанна хотноо болсон Олон улсын олимпийн хорооны Гүйцэтгэх зөвлөлийн хуралдаанаар Монголын жүдоч Саид Моллайгийн талаар хэлэлцсэн байна. Улмаар Саид Моллайг Монголын нэр дээр олимпод оролцохыг зөвшөөрсөн шийдвэр гаргажээ. ОУОХ-ны хэвлэлийн төлөөлөгч Марк Адамс “Саид Моллай Монголын өмнөөс олимпод оролцож болно. Ираны ҮОХ-ноос зөвшөөрөл авах шаардлагагүй” гэж мэдэгдсэн байна. Ингэснээр 81 кг-ийн жинд олимпод хэнийг явуулахыг манай улс дотооддоо шийдэх юм.
Харин Ираны Олимпийн хорооноос Саид Моллайг Монголын өмнөөс барилдах ёсгүй, иргэншлээ сольж, гадаадын улсын нэр дээр барилдахад гурван жил шаардагддаг гэж үзэн Спортын арбитрын шүүхэд хандсан байдаг. Арбитрын шүүх уг асуудлыг дөрөвдүгээр сарын 2-нд авч хэлэлцэх тов гаргаад байгаа билээ.
С.Сүлд
