НОБГ, НМХГ, НЭМГ, Агаарын бохирдолтой тэмцэх газраас сайжруулсан шахмал түлшний хэрэглээний талаар мэдээлэл хийлээ.

НМХГ-ын дэд дарга С.Даваасүрэн “Товчоодууд цагдаа, эмнэлэг, онцгой байдлын газартай хамтран хяналт шалгалт хийж байгаа. Энэ хүрээнд ойрын хүрээнд түүхий нүүрс нэвтрүүлсэн зөрчил гараагүй. Өнгөрсөн хугацаанд 30636 тээврийн хэрэгсэлтэй 90936 иргэн гарсан. Мөн 47956 тээврийн хэрэгслээр 156547 иргэн товчоодоор гарч явсан. Эдгээрт эрүүл мэндийн хуудас тарааж, дараагийн постод хуудсаа бөглөж өгөх зөвлөмж өгсөн.

Нийслэлийн Засаг даргын гаргасан захирамжийн хүрээнд 360 дэн буудал, нэг цанын бааз, 92 саун, 46 жуулчны бааз, мөн 22.00 цагаас хойш хоол үйлдвэрлэлийн үйл ажиллагааг зогсоох шаардлага хүргүүлсэн. Түүнчлэн 287 сүм хийд, 48 бильярдын үйл ажиллагааг зогсоолоо” гэв.

Нийслэлийн хэмжээнд амбулаторийн 39085 үзлэг хийгдсэнээс томуу болон томуу төст өвчний шинж тэмдэгтэй 951 хүн оношлогдсон. Өвчлөлийн 37 хувийг 0-5 насны хүүхэд эзэлж байна. Мөн авто зам товчоодод эрүүл мэндийн хяналтын найман цэг ажиллаж байна. Ингэхдээ иргэн бүрийн халууныг хэмжиж асуумж бөглүүлж байна. Энэ сарын 3-5-ны 08.00 цагийн байдлаар 30007 тээврийн хэрэгсэлд 104000 иргэн хяналтад хамрагдсанаас сэжигтэй тохиолдол илрээгүйг хэлсэн юм.

Мэдээллийн үеэр НЗДТГ-ын Хэвлэл мэдээлэл, олон нийттэй харилцах хэлтсийн дарга Ц.Мөнхбаатар “БНСУ-д халдвар өндөр тархаж байна. Хамгийн сүүлд фитнесс клуб болон тоглоомын газруудад халдвар тархсан гэсэн мэдээллийг өгсөн. Энэ хүрээнд манай улс эдгээр газруудыг хязгаарлах арга хэмжээ авсан нь цагаа олсон шийдвэр болжээ гэж бодож байна. Бүх нийтийн хөл хорио тогтоосонтой холбогдуулан хүүхдүүд гэртээ байгаа.

Энэ нөхцөлд хөдөлгөөний хомстолд орж магадгүй гэж үзэн хэвлэл мэдээллийн хэрэгслээр дасгал хөдөлгөөн хийлгэх чиглэл өгсөн. Энэ хүрээнд бэлтгэл ажлыг хангаад явж байна. Мөн асуумжтай холбоотой гомдол санал ирж байна. Иргэдийн зүгээс нэг асуумжаа дахин дахин асууж байна. Заавал асуух ёстой юм уу гэсэн гомдол ирж байна. Энэ нь таны болон гэр бүл цаашлаад нийт хүн амын сайн сайхны төлөө асууж байгаа учраас хот руу нэвтэрч байгаа болон гарах иргэдээс асуумж авч байна” гэлээ.

А.Сүх