Хилийн 0184 дүгээр ангийн малын суурийн ахлагч, ахлах ахлагч Б.Төмөрбаатарынх гурван хүүхэдтэй. Хүн болгон л Буржгар гэж дуудах сэргэлэн, хөдөлгөөнтэй энэ жаал тэдний дунд хүү бөгөөд хичээлийн амралтаараа гэртээ ирээд байгаа нь энэ. Үг хэл хурц, юм л бол алиалах нь тун эгдүүтэй. Харин бага охин Т.Мишээл өөрийгөө гурав хагас настай гэж танилцуулсан. Мишээл охидын зангаар энхрий бас сониучхан. Нүүрээ будаж гоёх сонирхолтой. Ээжээрээ уруулаа будуулж, түүндээ тун сэтгэл хангалуун байгаа харагдана. Ингээд малын суурьт цасан шуурга намдахыг хүлээх зуурт Буржгар буюу Т.Лхагвасүрэнтэй ярилцсан юм.

-Би чиний нэрийг анх Буржгар гэж бодсон. Яагаад тэгж дууддаг юм бэ?

-Тэр чинь миний хоч байхгүй юу. Уг нь намайг Т.Лхагвасүрэн гэдэг юм шүү дээ. Би ер нь зөндөө олон хочтой л доо. 

-Тийм үү, яагаад?

-Мэдэхгүй ээ. "Торооски", "Бэлэн гоймон", “Дотно сэтгэл”, “Доширак” гээд л явж өгнө өө. Буржгар үстэй болохоор тэгдэг биз.

-“Дотно сэтгэл” гэдэг нь ямар учиртай юм бэ?

-Бэлэн гоймон шүү дээ. Та мэддэггүй юм уу. Томчууд л намайг хочилж дууддаг юм. Би нэгдүгээр ангид байхдаа үсээ хусуулсан. Гэтэл дахиад л буржгар ургачихсан. 

-Энэ урт амралтыг яаж өнгөрөөж байна. ТВ хичээлээ үзэж байна уу?

-Жаахан л. Ихэнхдээ сагс үздэг. Өнөөдөр цасаар шуураад дохио байхгүй болчихсон. Үзэж чадсангүй ээ.

-Сагсны ямар багийг дэмждэг юм бэ?

-NBA-ийн Милоуки багийг дэмждэг. Одоо 44 хожилтой яваа. Араас нь Торонто 39 хожилтой. Өнөөдөр бас л хичээлээ ч, сагсаа ч үзэж чадсангүй. Уг нь “Сан Антонио Спөрс"-"Клипрес” багууд тоглох байсан. Сагт өглөө 09.30 гэж эхлээд 11.00 цаг өнгөрөөгөөд дуусдаг юм. 

-Шүтдэг тамирчин бий юү?

-“Милоуки Бакс” багийн Яннис Адетокунпо. 34 дугаартай тоглодог юм.

-Монголын багаас? 

-Үндэсний лигийн “Алдар-Танан” багийг дэмждэг. Манай баг бас тэргүүлж байгаа. Гэхдээ ойрд тоглоогүй. Та ямар баг дэмждэг юм?

-Лейкрес.

-Танай багт ямар ямар тамирчид байдаг вэ. Мэдэх үү?

-Сайн мэдэхгүй байна аа.

-Өө. Леброн, Рондо, Энтони Дэвис байна. Мэднэ биз дээ. Бас 0, 39 дугаартай тоглогчид чинь сайн ш дээ. Нэрийг нь мартчихаад байна аа. Манайд Яннис, Брук Лопиз гээд байна. Коби сонинд “Би ягаан, шар өнгөнд итгэдэг” гэж ярилцлага өгсөн байна лээ. Би нэг сониноос уншсан юм. Охинтойгоо явж байхад нь муу юм болсон гэсэн. Тэр өдрийн NBA-ийн тоглолтууд бөмбөг гаргаад 48 секундын турш довтолгоон хийхгүй хүндэтгэл үзүүлсэн ш дээ. Харамсалтай. Та Харданыг мэднэ биз дээ. Көрри гараа гэмтээчихсэн, харсан уу?

-Мэднэ, тийм ээ. Чиний дуртай хичээл?

-Биеийн тамир, дүрслэх урлаг, монгол хэлд дуртай. Математикийн хичээлд жаахан дургүй. Шоо дээр гоё бичих гэхээр нэг том, нэг нэг жижиг болоод байдаг юм. Харин гулд дээр бичихээр амар ш дээ. 

-Шоо, гулд гэж ямар дэвтэр байдаг юм бэ?

-Яагаав дээ. Жижиг жижиг дөрвөлжинтэй нь шоо. Бүдүүн бүдүүн зайтай, нэг нь жоохон бүдүүн нь гулд дэвтэр ш дээ. Хурдан л сургууль ороосой. Дотуур байранд би ахтайгаа цуг байдаг юм. Бас сургууль дээрээ жүдогийн дугуйланд явдаг. Одоохондоо олигтой мэх сураагүй л байна. Волейбол, сагсан бөмбөгийн дугуйлан хичээллээд жүдогийн бэлтгэл бараг орохгүй байгаа. Сагсан бөмбөгийн дугуйланд явах гэтэл гуравдугаар анги гээд авахгүй гэсэн.

Ийм нэг яриа хөөрөөтэй, өхөөрдмөөр хүүтэй танилцсан юм. Найман настай хэвлүүхэн энэ хүүд өөрийн сонирхдог NBA-гийн тоглолтууд болоод тамирчдын талаар мэдэхгүй зүйл гэж алга. Тиймээс ч түүнтэй сагсны талаар ярилцахдаа ихэнх асуултанд нь “унасан” шүү. Өөрийн гэсэн хүсэл мөрөөдөл, сонирхолтой Т.Лхагвасүрэн маань ирээдүйд нэртэй тамирчин болох байх. Дүүдээ сурлага, спортын өндөр амжилтыг хүсье.