Эрүүл мэндийн яамнаас COVID-19 халдварын голомттой бүс нутаг руу аялахгүй байх, гадаадаас ирж байгаа иргэд хариуцлагатай байхыг өнөөдөр анхаарууллаа. Тодруулбал, Эрүүл мэндийн яамны Эмнэлгийн тусламжийн газрын дарга Я.Буянжаргал "Истанбул-Москва-Улаанбаатар чиглэлийн нислэгээр ирсэн 129 зорчигчоос хоёр хүнийг тусгаарласан. Истанбул-УБ чиглэлээр 217 хүн ирсэн байна.  Мөн БНСУ Японоос ирсэн зургаан хүнийг ажиглалтад авна. Инчоний нисэх буудлаас транзит чиглэлээр зорчсон 31 иргэнийг эмчийн хяналтад авсан талаар мэдээллээ.

Мөн ХӨСҮТ-ийн захирал Д.НЯМХҮҮ "ХӨСҮТ-д тусгаарлагдсан гурван тохиолдлын шинжилгээний хариу сөрөг гарсан. Австрали улсаас ирсэн иргэдээс коронавирусний халдвар илэрсэн мэтээр ташаа цацагдсан. Энэ сарын 6-нд нийт 25 хүнийг ажиглалтад авсан бол өнгөрсөн хугацаанд нийт 259 сэжигтэй тохиолдолд оношилгоо хийсэн. Ажиглалт, тусгаарлалтын дэглэмээ сахиж байгаа хүмүүст талархал илэрхийлье. 

ДЭМБ-ын зөвлөмж, халдвар голомтлон гарч буй улс орнуудын туршлагад үндэслэн цаашид авах арга хэмжээ бага зэрэг өөрчлөгдөх байх. Дэлхийн хэмжээнд халдвар хумигдах хандлагатай байгаа ч анхаарлаа сулруулж болохгүй. Европын орнууд тэр дундаа Итали маш түвэгтэй байдалд орсон. Солонгос нэлээн сайн ажилласны үр дүнд өвчнийг хяналтдаа авч эхэлж байна. Гэвч нөхцөл байдал бүрэн нааштай биш байна" гэлээ.

Г.Маргад