Энэ сарын 02-ны өдөр "Аэрофлот"-оор ирсэн, Дорноговь аймгийн Улаанбадрах суманд байх "Бадрах энержи" компанид ажилладаг Францын иргэн коронавирусний халдвар тохиолдол илэрчээ. Үүнтэй холбогдуулж онгоц, зочид буудал, гал тэрэг зэрэгт нэгдүгээр хавьтал болсон хүмүүсийг тусгаарлаж, дам хавьтсаныг олж тогтоосон байна.

Монголд ажилладаг Францын 57 настай иргэн харьж, 10 гаруй хоноод гуравдугаар сарын 2-нд иржээ. Ирсэн даруйд нь өөрийгөө 14 хоног тусгаарлахыг хэлсэн байна. Шинж тэмдэг илэрснээс хойш нэгдүгээр хавьтлын хүмүүсийг цагдаа, тагнуулынхан тогтоосон байна. Тэдгээр нь 100 орчим хүн байгаа аж.

Улмаар хотоос гарах, хот руу орох хот хоорондын тээвэр, хувийн автомашины хөдөлгөөнийг өнөөдрөөс энэ 16-ний даваа гарагийн 07.00 цаг хүртэл хориглолоо. Мөн замд явж байгааг хот руу оруулахаар болсон байна. Онцгой комисс, холбогдох байгууллага шаардлагатай бүх арга хэмжээг авч байна. Мөн иргэд айж сандралгүй, тайван байж, маскаа зүүн, гараа байнга угааж байхыг уриалж байна.