COVID-19 халдварын анхны тохиолдол Дорноговь аймагт бүртгэгдсэн. Үүнтэй холбогдуулан мэргэжлийн байгууллагуудын зүгээс тайван байж, сонор сэрэмжээ алдахгүй байхыг анхааруулж байна.

Энэ талаар Дорноговь аймгийн Засаг дарга Т.Энхтүвшин  өөрийн цахим хуудсаараа дамжуулан нутгийн иргэддээ хандаж “Ард иргэдээ сонор сэрэмжээ дээшлүүлэхийг хүсье.

Өнгөрсөн энэ сарын 2-нд Улаанбаатар хотод ирсэн Франц улсын иргэнээс коронавирусын халдвар илэрлээ. Тус иргэн энэ сарын 7-нд Улаанбаатар хотоос Дорноговь аймагт ирж, сэжигтэй тохиолдол илрэх үеэс Улаанбадрах суманд байрлах ажилчдын байранд тусгаарласан. Улс болон аймгийн Онцгой комиссоос онгоц, зочид буудал, гал тэрэг зэрэгт нэгдүгээр хавьтлын иргэдийг олж, бүх хүмүүсийг тусгаарласан, мөн дам хавьтлын иргэдийг олж тогтоож байна.

Аймгийн Онцгой комиссоос өглөөний 03.00 цагаас эхлэн хуралдаж, яаралтай арга хэмжээнүүдийг авч байна. Улс, хот хооронд болон хөдөө сумдын автозамын хөдөлгөөнийг өглөө 07.00 цагаас эхлэн хориглолоо. Коронавирусын тохиолдол илэрсэн улс орнуудаас ирж байгаа нислэгийг хаах саналыг Улсын онцгой комисст хүргүүллээ.

Иргэд та бүхэн шаардлагагүй тохиолдолд гадуур гарахгүй байж, гарын болон орчны ариутгал халдваргүйтгэлээ хийж, маскаа зүүн, сэтгэл санаагаа тайван байлган дархлаагаа дэмжээрэй” гэжээ.

А.Сүх