Шинэ төрлийн коронавирусний халдварын талаар Эрүүл мэндийн яамнаас мэдээлэл хийлээ.
ЭМЯ-ны Хэлтсийн дарга Д.Нарангэрэл “Өнөөдрийн байдлаар дэлхийн 117 оронд COVID-19 өвчлөл бүртгэгджээ. Иран, Испани, Норвеги, Швейцарь зэрэг улсуудад халдвар ихээр тархаж байна. Бид тахлын үед айдас түгшүүрт автаж болохгүй. Бүгд хамтдаа эв нэгдэлтэй өвчинтэй тэмцэх нь чухал байна. Цар тахлын гол анхаарах зүйл нь халдвар авсан иргэнийг эрт илрүүлж, эмчлэх, халдварын тархалтыг таслан зогсоох шаардлагатай. Эрүүл мэндийн байгууллагынхан үүнд анхаарч ирсэн. Тиймээс айж сандарч, дархлаагаа унагаж болохгүй. Тэгвэл өртөх магадлал өндөр болно. ДЭМБ-аас эрсдэлт бүлэгт 60-аас дээш насныхан гэж үзэж байсан бол өнөөдөр 40-өөс дээш насныхныг эрсдэлт бүлэгт оруулж, зөвлөмж гаргалаа” гэлээ.
ДЭМБ-ын мэргэжилтэн О.Ариунтуяа “ДЭМБ-ын энэ сарын 10-ны мэдээллээр COVID-19 халдварын 118326 тохиолдол бүртгэгдлээ. Сүүлийн 24 цагийн дотор 286 хүн нас барлаа. Үүнээс БНХАУ-д 31 хүн, БНСУ-д 60 хүн нас барлаа. Сүүлийн хоёр долоо хоногт БНХАУ-аас бусад улсуудад халдвар нэмэгдэж байна. Мөн цаашид халдвар эрчимтэй тархана гэж үзсэн. COVID-19 халдварын ДЭМБ-аас цар тахал гэж тодорхойлсон. Тус байгууллагаас улс орнуудад яаралтай арга хэмжээ авахыг сануулсаар байна.
Одоогоор дэлхийн 81 улсад халдвар бүртгэгдээгүй байна. Халдварын тохиолдлыг эрт илрүүлж, хавьтлыг нэг бүрчлэн судалснаар голомт болохоос сэргийлж чадна” гэв.
А.Сүх
