Шинэ төрлийн коронавирусний халдварын талаар Эрүүл мэндийн яамнаас мэдээлэл хийлээ.

ЦЕГ-ын дэд хурандаа П.Эрдэнэбат “Франц иргэний хувьд ойрын болон дам байдлаар харилцаанд орсон иргэдийг урьдчилсан байдлаар тогтоох ажиллагаа явуулахад 300 гаруй хүнтэй ямар нэгэн байдлаар уулзсан, харилцаанд орсон нь тогтоогдсон. Манай улсын иргэд ч гэсэн гадаадад зорчоод ирж байна. Ингэсэн тохиолдолд иргэд өөрсдийгөө сайн дураар тусгаарлахыг анхааруулж байна. Мөн шатахууны хомсдол үүсэхгүй учир бөөгнөрөл үүсгэхгүй байхыг анхааруулж байна” гэв.

ХӨСҮТ-ийн ерөнхий захирал Д.Нямхүү “Франц иргэнтэй ойрын хавьтал хянагдаж байгаа 126 хүний шинжилгээнээс халдвар илрээгүй. Энэ сарын 11-нд ХӨСҮТ-д найман сэжигтэй тохиолдол тусгаарлагдаж тандалт, шинжилгээ хийгдэж байна. Мөн өдөр 149 иргэнийг ажиглалтад авсан. Франц иргэний хувьд эмчилгээ хийгдэж байна. Давтан шинжилгээ өнөөдөр авсан. Хамгийн гол нь сэтгэл санааны хувьд тогтворгүй байна. Мөн Монголд өвчин тараасан талаар дэлхий ярьж, харж байгаа талаар сэтгэл санаа нь маш их зовж,  тогтворгүй байна.

Бидний зүгээс зөвлөгөө өгч, тайвшруулахыг хичээж байна. Айж сандарч, стрессдэх нь дархлааг улам унагадаг учраас эмчилгээ үр дүн багатай болох эрсдэлтэй. Тиймээс тухайн иргэнийг тайвшруулахад "Танай эмчилгээ, үйлчилгээнд найдаж байна. Итгэж байна" гэж хэлсэн. Гаднын хүмүүс нарийн дэг журамтай байдаг. Манай эмчийг хүндэтгэж, дүрмээ баримталж байгаа нь эмчилгээнд нь ахиц дэвшил болох юм. Энэ хүний эрүүл мэндийн төлөө өдөр шөнөгүй нягталж хонолоо” гэлээ.

Б.Лхам