Шинэ төрлийн коронавирусний талаар Эрүүл мэндийн яамнаас мэдээлэл хийлээ.

ЭМЯ-ны хэлтсийн дарга Д.Нарангэрэл “Өвчний тархалтыг хумих, эрсдэлийг хязгаарлах гол зүйл нь гэртээ цэвэрлэгээ хийх, халдваргүйжүүлэлт юм. Халдваргүйжүүлэлтийн эхний шат нь цэвэрлэгээ байдаг. Тиймээс гэртээ өдөр бүр чийгтэй цэвэрлэгээ хийж, агаар сэлгэлтийг тогтмол хийж байгаарай. Мөн гараа тогтмол угааж хэвшээрэй” гэлээ.

ХӨСҮТ-ийн захирал Д.Нямхүү “Өвчтөний ойрын хавьтал болсон 58 хүний шинжилгээнээс халдвар илрээгүй. Мөн шинж тэмдэг илрээд уурхайн кэмпт ойрхон байсан есөн хүний шинжилгээ багтсан байгаа. Өнөөдөр Дорноговь аймгийн кэмпээс нэмж шинжилгээ ирнэ. Учир нь тодорхой хугацааны дараа дахин шинжилгээ авъя гэж ярилцсан юм.

Энэ сарын 12-нд нэг сэжигтэй тохиолдол тусгаарлагдаж шинжилгээ хийгдэж байна. Түүнчлэн энэ сарын 11-нд 25 хүнийг ажиглалтад авсан. Хяналтад байгаа хүмүүсийнхээ дунд шинжилгээ аваагүй ч гэсэн шинж тэмдэг илрэх нь үү гэдгийг байнга хянаж байгаа. Мөн гэрээрээ байгаа хүмүүс шинж тэмдэг илэрвэл заавал мэдэгдэх ёстой шүү” гэдгийг онцоллоо.

А.Сүх