Үндэсний статистикийн хорооноос өнгөрсөн сарын нийгэм, эдийн засгийн байдлыг танилцууллаа.

Улсын хэмжээнд энэ оны эхний хоёр сарын байдлаар 11.9 мянган эх амаржсан нь өмнөх оны мөн үеэс 138-аар нэмэгдсэн байна. Амаржсан эхчүүдийн 8.9 мянга буюу 75.0 хувь нь зургаа, түүнээс дээш удаа жирэмсний хяналтад хамрагдсан нь өмнөх оны мөн үеэс 178-аар нэмэгдсэн байна. Нийт амаржсан эхчүүдийн 45 нь гэртээ төрсөн бөгөөд өмнөх оны мөн үетэй харьцуулахад хоёроор буурчээ.

Эрүүл мэндийн яамны “Төрөлтийн цахим бүртгэл”-ээр хоёрдугаар сард 5597 эх амаржиж, 5661 хүүхдэд регистрийн дугаар олгожээ. Нийт төрсөн хүүхдийн 2843 нь эрэгтэй, 2818 нь эмэгтэй, 128 нь ихэр, хүүхдийн дундаж жин 3390 грамм, дундаж өндөр 50.7 см байна.

Амаржсан эхчүүдийг насны бүлгээр харвал, дөрвөн хувь нь 20 хүртэлх насныхан, 92.4 хувь нь 20-39 насныхан, 3.6 хувь нь 40 буюу түүнээс дээш насныхан байна. Амаржсан эхчүүдийн 1.4 хувь нь боловсролгүй, 4.2 хувь нь бага, 12.7 хувь нь суурь, 33.4 хувь нь бүрэн дунд, 6.4 хувь нь техникийн болон тусгай мэргэжлийн, 40.7 хувь нь дипломын болон бакалаврын, 1.2 хувь нь магистр, докторын зэрэгтэй байна.

Улсын хэмжээнд энэ оны эхний хоёр сард 12 мянган хүүхэд төрсөн нь өмнөх оны мөн үеэс 150-аар нэмэгдсэн байна.Нийт амьд төрсөн хүүхдийн 11.6 мянга нь төрсний дараа 1 цагийн дотор хөхөө амласан бөгөөд өмнөх оны мөн үеэс 115-аар нэмэгджээ. Нийт амьд төрөлтийн 93 нь төрөлхийн гажигтай, 587 нь 2500 граммаас бага жинтэй байна. Амьгүй төрөлтийн түвшин 1000 нийт төрөлтөд 5.3 ногдож байна.

Харин 2020 оны 2 дугаар сард 5715 хүүхэд амьд төрсөн нь өмнөх сараас 545-аар буурчээ. Нийт амьд төрсөн хүүхдийн 5538 нь төрсний дараа нэг цагийн дотор хөхөө амласан нь өмнөх сараас 484-өөр буурсан байна. Нийт амьд төрөлтийн 38 нь төрөлхийн гажигтай, 264 нь 2500 граммаас бага жинтэй байна. Амьгүй төрөлтийн түвшин 1000 нийт төрөлтөд 6.3 ногдож байна.