Улсын онцгой комиссын Шуурхай албанаас мэдээлэл хийлээ.

Энэ үеэр Улсын ОБЕГ-ын дэд дарга, хурандаа Б.Ууганбаяр "Өнөөдөрийн байдлаар улсын хэмжээнд 1734 хүн тусгаарлагдсан байна.  Халдвартай  бүх нийтээрээ тэмцэж байна. Гэтэл сүүлийн өдрүүдэд умамсаргүй, буруу тийш хандуулсан, турхирсан мэдээлэл цацах нь олширлоо. Үндэсний аюулгүй байдалтай холбоотой асуудал учир хариуцлагын асуудлыг чангаруулна. Гаднаас ирсэн зорчигчдын тээшийг 14 хоног ариутгаад, хадгална. Танил тал, дарга нараар яриулахаа болиорой. 
 

Тусгаарлах байранд хоол оруулах гэсэн 225 дуудлага өнөөдөр ирсэн. Ийм юм байхгүй ээ. Төрийн дээд түвшнээс шийдвэрээ гаргаж байна.

Дунд шатны байгууллагууд үүргээ ухамсарлаж ажиллаж байна. Доод түвшний удирдлагуудын асуудлыг цэгцлэх гэж үзэж байна. Өнөөдөр тусгаарлах байран дахь иргэдэд шаардлагатай зүйлийг нь оруулна. Цагдаагийн байгууллагад оруулах зүйлсийн нэрсийг өгсөн. Өнөөдөр 10.00-16.00 цагийн хооронд нарийн дэг журамтайгаар эд зүйл оруулна. 

Өнөөдөр тусгаарлах байрны үйл ажиллагааг шалгана. Парк зочид буудлын эзэн хүндрэлтэй байна гэдгээ хэлсэн. Үнэхээр ийм зүйл бий. Тусгаарлах байран дахь иргэн тагтан дээрээ гараад зогсчихсон байсан гэнэ үү. Тусгаарлах байр шүү дээ. Гэтэл шүлсээ үсэргэж, халдвар ариутгалын дэглэм зөрчих юм бол хатуу хариуцлага тооцно шүү. 

 Зочид буудал нэртэй болохоос биш тусгаарлах байр шүү дээ. Буудлын үйлчилгээ нэхэхгүй шүү. Үнэхээр хоёр халбага хоол өгч байгаа бол тэрийг нь шалгана.

Саяхнаас хөдөлгөөний хязгаарлалтыг зогсоосон. Гэтэл бага насын хүүхдээ дагуулсан эцэг, эхчүүд гадуур явж байна. Бүх амны хаалт зүүхгүйгээр шүү дээ. Ийм байж болох уу. Даанч дээ. Та хүүхдээ халдвараас, эрсдэлээс хамгаалах ёстой биз дээ. Гэтэл дагуулаад явах юм, ямар учиртай юм бэ. Хүн өөрөө өөрийгөө хамгаалах ёстой биз дээ. Төр бүгдийг нь хийх ёсгүй биз дээ.

Тусгай үүргийн онгоцоор ирсэн иргэдийн гадаад паспортыг хурааж авсан. Учир нь тусгаарлагдсан иргэдийн олонх нь төлбөрөө төлөөгүй. Тиймээс төлбөрөө төлсөн иргэдийн паспортыг өгнө.

Түүнчлэн сошиль орчинд элдэв мэдээлэл тавихаа болиочээ. Элдэв пост хийх гээд гар чинь чичрээд байдаг бол жаахан тэс л дээ. Хариуцлага ярина шүү" гэлээ.

 Г.Маргад