Коронавирусний халдварын талаар ЭМЯ-аас мэдээлэл хийлээ. 

ДЭМБ-ын мэргэжилтэн О.Ариунтуяа “Сүүлийн мэдээгээр дэлхийн хэмжээнд нийт 292.142 тохиолдол, 12784 нас баралт бүртгэгдсэн байна. Африкийн дөрвөн оронд шинээр халдвар бүртгэгдсэн. Халдвар өндөр байгаа орнуудад гэрээсээ гарахгүй байхыг уриалж байна. ДЭМБ-ын зүгээс иргэдийг гэртээ байх үедээ дасгал хөдөлгөөн хийхийг уриалж хөнгөн, дунд, хүнд шинж тэмдэгтэй бүх иргэлийг тусгаарлаж арга хэмжээ авахыг анхаарууллаа. Мөн ДЭМБ-ыг нэрийг ашиглан иргэдийг залилах явдал их байгаа тул мэдээллийг сайтар нягтлахыг анхааруулж байна” гэв

ЭМЯ-ны Гадаад харилцааны хэлтсийн дарга Б.Янжмаа “Итали, Иран, АНУ, Иран, Испани, Франц зэрэг улсуудад халдварын тохиолдол өндөр байна. Франц улсад өдөрт 4000 гасруй сорьц хийж байгаа ч энэ нь хангалтгүй байгаа бөгөөд тоон мэдээллийн хувьд баттай биш гэдгийг хэлж байна. Мөн АНУ-д 30 мянга гаруй хүн халдвар авч, 400 гаруй хүн нас бараад байгаа. Нөхцөл байдал дөрөв, тавдугаар  сард улам нэмэгдэх магадлалтай гэдгийг АНУ-ын удирдлагууд хэлж байна. БНСУ-ын хувьд вирусын халдварыг гаднаас зөөвөрлөх тохиолдол нэмэгдсэн тул европын орноос ирж байгаа зорчигчдыг заавал тусгаарлаж, шинжилгээ авч байна. Ням гарагт БНСУ-д халдварын 98 тохиолдол шинээр нэмэгдсэний 15 нь европын орноос ирсэн иргэд байжээ” гэлээ.

А.Сүх