УОК-ын шуурхай штабаас мэдээлэл хийлээ. 

Гадаад харилцааны яамны Консулын газрын дарга Л.Мөнхтүшиг “Дэлхий нийтэд коронавирусний тархалт цар тахлын хэмжээнд очсон энэ үед олон орнууд хилийн хориг тавьж байна. Үүнтэй холбогдуулан иргэд эх орон руугаа ирэх иргэдийн боломж нь хумигдаж байна. Он гарснаас хойш 21 мянга орчим иргэн эх орондоо ирсэн. Гаднын улсад 190 гаруй мянган иргэн ажиллаж, амьдарч байна. Юуны өмнө ОХУ, БНХАУ гаднаас ирж байгаа иргэдэд өндөр хяналт тавьж, тусгаарлах шийдвэр гаргасан.

ОХУ гадаад иргэдийг нэвтрүүлэхгүй байх, дамжин өнгөрөхийг хориглосон. Энэ утгаараа БНХАУ болон ОХУ-аар дамжин ирэх боломжгүй болсон. 

Гадаадад байгаа иргэдийг цаашид тусгай үүргийн нислэгээр татан авах эсэхийг эцэслэн шийдвэрлээгүй. Тиймээс иргэддээ анхааруулж хэлэхэд тухайн нутагтаа аюулгүй байдлаа ханган аль болох тайван байхыг анхааруулж байна. Мөн гадаад улс руу нислэг үйлдэх эсэхийг асууж байна.  Тусгай нислэгээр ирэх иргэд Гадаад харилцааны яам, Улсын онцгой комисс, МИАТ-д өргөдөл өгөх хэрэггүй. Бид өргөдөл хүлээж авахгүй. Хэрэв нислэг үйлдэгдэх нь тодорхой болох тохиолдолд тухайн иргэн виз авдаг дүрэм журмаараа авна. Энэ тухай цаг үед нь зарлана.

Түүнчлэн Япон, БНСУ явмаар байна гэж яаман дээр ирж үймээн үүсгэж байгаа явдал их байна. Тиймээс ийм хүсэлт тавихаа боль. Ном журмынхаа дагуу зөвшөөрлөө ав” гэлээ.

МХЕГ “Мэргэжлийн хяналтын байгууллага Алтанбулаг, Сэлэнгэ, Дархан зэрэг газруудад газруудад дөрөв дэх хоногтоо ажиллаж байна. Өнөөдрийн байдлаар Сэлэнгэ аймагт 196, Орхонд 86 иргэдийг тусгаарласан. Түүнчлэн Баян-Өлгий аймагт нийт 306 зорчигчийг түр тусгаарласан. Холбогдох хяналт, шалгалт хийж байна. Мөн нийслэл болон томоохон суурин руу тээвэрлэж байгаа хүнс болон бусад бараа бүтээгдэхүүний тээвэрлэлтийн асуудлыг цагдаагийн хяналтан дор зохион байгуулна” гэв.

Б.Лхам