Шинэ төрлийн коронавирусний халдварын нөхцөл байдлын талаар Эрүүл мэндийн яамнаас мэдээлэл хийлээ.

Мэдээллийн эхэнд ДЭМБ-ын мэргэжилтэн О.Ариунтуяа “Халдвар өнөөдрийн байдлаар нийт 196 оронд бүртгэгдээд байна. ДЭМБ-ын байгууллагын мэдээгээр нийт 375.498 тохиолдол бүртгэгдээд байна. Итали, Герман, Иран, Итали зэрэг орнуудад 10 мянгаас дээш тохиолдол нэмэгдэж байна. Италид гарсан нийт тохиолдлын 80 орчим хувь нь гурван мужид нь тархсан байна. БНХАУ-ын Хубэй муж өнөөдрөөс хөл хориогоо нээсэн. ДЭМБ хийл болон хөлбөмбөгийн холбоотой хамтарсан кампанит ажил хийж эхэллээ. Энэ хүрээнд таван уриалга гаргалаа. Тодруулбал, ам хамраа дарж найтаах, гараа ариутгах, бусдаас нэг метрийн зай барих, халуурах шинж тэмдэг илэрвэл гэртээ байх зэрэг зөвлөмжийг гаргаад байна” гэлээ.

ЭМЯ-ны Эмнэлгийн тусламжийн газрын дарга Я.Буянжаргал “Хөл хорио тогтоож эхэлснээс хойш нийт 3413 иргэн ажиглалтад байсан. Одоогоор 2083 иргэн ажиглалтад байна. Тусгаарлалтад байгаа иргэдтэй хамт 300 гаруй эмнэлгийн ажилчид байна. Манай улсын хувьд эхний давалгайнаас амжилттай сэргийлж чадсан. Одоо хоёр дахь давалгаанаас хэрхэн сэргийлэх, эмч эмнэлгийн мэргэижлтнүүдийг бэлтгэхээр ажиллаж байна. Мөн 5000 ор шинээр нэмэгдүүлэхээр болсон. Үүнтэй холбоотой бүх тооцооллыг хийсэн. Шаардлага гарвал төлөвлөгөөт мэс засал зэргийг түр хойшлуулна. Одоо батлагдсан тохиолдлынхоо тооцоог гарган нэг өвчтөнд хийх тооцооллыг гаргаж байна. Тиймээс эм эмнэлгийн хэрэгслийн зардал зэрэг бүх тооцооллыг хийсэн. Гэрийн тусгаарлалтад шилжиж байгаа иргэдэд хатуу зааврыг өгсөн. Хамгийн гол нь халдварыг цааш нэмэгдүүлэхгүй, газар авахуулахгүй байх нь чухал" гэдгийг онцолсон юм.

А.Сүх