Шинэ төрлийн коронавирусний тархалттай холбоотой асуудлаар Эрүүл мэндийн яамнаас мэдээлэл хийлээ. 

Мэдээллийн эхэнд ЭМЯ-ны хэлтсийн дарга Д.Нарангэрэл "ОХУ-д халдварын тархалт өндөр хувьтай байна. Тодруулбал, өнгөрсөн ням гарагт шинээр 2187 шинэ тохиолдол бүртгэгдсэн. Үүний багагүй хувийг бага насны хүүхэд эзэлж байна. Тиймээс хүүхдүүдээ дагуулж дэлгүүр орохгүй байх, гадуур явахгүй байхыг анхааруулж байна. Сонор сэрэмжээ өндөрсгөхгүй бол хойд талаараа аюултай болж эхэллээ. Одоогийн байдлаар манай улсад 1778 хүн ажиглалтад байна. Үүнээс жирэмсэн долоо, зүрхний шигдээстэй хоёр, бага насны нэг хүнд эмнэлгийн яаралтай тусламж үзүүлсэн" гэлээ. 

ДЭМБ-ын мэргэжилтэн О.Ариунтуяа “АНУ-д сүүлийн өдрүүдэд халдвар долоо дахин нэмэгдэж, 31 мянган шинэ тохиолдол нэмэгдлээ. Харин нас баралтын хэмжээгээр Франц улс хамгийн өндөр байна. Итали, Испани, Цранц, Герман зэрэг улсуудад халдвар өнгөрсөн долоо хоногт буурах хандлага руу орлоо. Дэлхийн хэмжээнд 1.8 сая хүн өвчлөөд байна. Халдвар анх гарснаас хойш эрүүл мэндийн нөөцийн хүчин чадлыг шавхаж, эдийн засагт хүнд нөлөө үзүүлээд байна. Цар тахал зөвхөн эрүүл мэндийн салбарын ажил биш бүхий л салбарын хамтын ажиллагааг шаардаж байна” гэлээ.

А.Сүх