ҮСХ-оос энэ оны нэгдүгээр улирлын нийгэм, эдийн засгийн байдлыг танилцууллаа. Тодруулбал, төрийн албан хаагчид 2019 оны эцэст 198.5 мянга болж, өмнөх оны мөн үеэс 4.9 мянгаар өссөн байна. Төрийн албанд 2019 онд 4906 албан хаагч нэмэгдсэний 4194 нь төрийн үйлчилгээний, 484 нь төрийн тусгай, 182 нь улс төрийн, 46 нь төрийн захиргааны албан хаагчид байна.

Нийт төрийн албан хаагчдын 120.7 мянга буюу 60.8 хувь нь эмэгтэй, 77.7 мянга буюу 39.2 хувь нь эрэгтэй албан хаагч байгаа аж.

Төрийн албан хаагчдыг төрийн албаны ангиллаар авч үзэхэд 3.5 мянга нь төрийн улс төрийн, 19.0 мянга нь төрийн захиргааны, 38.6 мянга нь төрийн тусгай, 137.2 мянга нь төрийн үйлчилгээний албан хаагчид байна.

Төрийн албан хаагчдыг албан тушаалын төрлийн хувьд авч үзэхэд, удирдах албан тушаалтан 7.6 хувь, гүйцэтгэх албан тушаалтан 23.2 хувь, туслах албан тушаалтан 69.2 хувийг тус тус эзэлжээ.

Нийт төрийн албан хаагчдыг боловсролын түвшнээр авч үзэхэд, 61.1 хувь нь дээд, 33.5 хувь нь дунд, 5.4 хувь нь суурь болон түүнээс доош боловсролтой байна.

Төрийн албан хаагчдын 9.5 хувь нь 25 хүртэлх, 85.4 хувь нь 26-аас 55 насныхан, 5.1 хувь нь 56-аас дээш насныхан эзэлж байна.