Говь хээрийн бүсэд зэрлэг амьтад усгүйн улмаас харангадан үхэж байгаа талаар усны эрдэмтэд мэдээлэл хийлээ.

Тэдний зүгээс “2009 онд С.Баярын Засгийн газрын үед томоохон орд газруудыг хөдөлгөөнд оруулахын тулд Үндсэн хуулийн 6.1-д заасан “Ус бол төрийн мэдэлд байна” гэсэн заалтыг зөрчиж, тодорхой ААН-д давуу байдал олгосон. Тодруулбал, хайгуулын зардал гаргасан компани газрын доорх усыг захиран зарцуулах эрх өгөхийн тулд ийм заалт нэмж тусгасан юм. Нөгөөтээгүүр, ус ашиглах зөвшөөрлийг олгох хугацааг таван жилээр олгож байсан бол 20 жилээр олгож байсан тохиолдол бий. Үндсэн хуулиар орсон өөрчлөлтөөр газрын доорх баялаг, ус нийтийн өмч байна гэж заасан нь С.Баярын Засгийн газрын гаргасан заалттай зөрчилдөж байна.

Мөн үндсэн эх үүсвэр нь газрын доорх баялаг буюу усны орд гэж байдаг. Энэ орд нөхөн сэргээгдэхдээ дор хаяж 10 мянган жилийн дараа сэргээгддэг. Энэ ч утгаараа их үнэ цэнтэй орд юм. Тиймээс газрын доорх усан ордыг ашиглаж үйлдвэрлэл явуулж байгаа байгууллагуудын ордын өмчлөл төрийн мэдэлд байх ёстой ч энэ заалт хэрэгжихгүй байна. Тиймээс бид Үндсэн хуулийн цэцэд шаардлага хүргүүлээд 20 гаруй хоног болсон ч хариу өгөөгүй. Хэн гэдэг шүүгчид очсон талаар мэдээлэл авахыг хүссэн ч "нууц" нэрээр хэлж өгөөгүй. Тиймээс иргэддээ хандаж мэдээлэл хийж байна” гэлээ.

А.Сүх