Улсын онцгой комиссын шийдвэрээр гадаад дахь монголчуудаа таван авах ажиллагаа түр хойшлоод байна. Дотоодод халдвар дэгдэхээс урьдчилан сэргийлэх, түүнчлэн тусгаарлах байрны нөөц боломж, эмч ажилчдын ажлын ачаалал зэргийг үндэслэн ийм шийдвэр гаргасан нь цөөнгүй иргэдийн дунд хүлээлт үүсгээд буй юм.

Тэгвэл энэ сарын 30-ний өдөр Солонгос, Австрали улсыг чиглэлд тусгай үүргийн онгоц нисгэхээр  ярилцаж байгаа аж.

Солонгосын хувьд агаарын хил нээлттэй бөгөөд өөрийн иргэдээ хэзээ л бол хэзээ татан авах боломжтой гэдгийг мэдэгджээ. Харин Австралийн талаас агаарын хилээрээ нэвтрэх зөвшөөрлийг олгосон байна. Одоогоор яг таг шийдсэн зүйл байхгүй ч гэлээ дээрх улсууд дахь нөхцөл байдлыг дахин үнэлсний үндсэн дээр эцсийн шийдвэрийг гаргах юм байна.

Тэгвэл үүнээс гадна БНЭУ дахь монголчуудын нөхцөл байдал дордож буйг тус улсад гацаад буй монгол иргэд цахим орчинд мэдэгдсээр буй. Тодруулбал, тус улсад коронавирусний халдвар эрчимтэй тархахын сацуу ядуусын хорооллын иргэд хүнсний дутагдалд орж, улс даяараа өлсгөлөнд нэрвэгдэх аюул тулгарсан бол зарим газарт үймээн самуун үүсэх эрсдэлтэй болжээ.

Яг ийм цаг үед Энэтхэг улсын зүгээс манай улсад 100 ам.долларын эм хандивлах болсон талаараа цахим хуудастаа байршуулсан байна.

БНЭУ-аас Монгол Улсад суугаа Элчин сайдын яамнаас энэ талаар “Монголын талаас тусгай үүргийн онгоц ирвэл энэ онгоцоор, үгүй бол каргогоор явуулна” гэдгийг хэлсэн байна.

Хамгийн хачирхалтай нь, Энэтхэг улс бол эм, эмэн бүтээгдэхүүн үйлдэрлэлээрээ дэлхийд тэргүүлчид тооцогддог. Энэ утгаараа экспортын гол нэрийн бүтээгдэхүүний нэг юм. Гэтэл Франц зэрэг улсаас эмийн экспортоо багасгалаа гэж хэдхэн хоногийн өмнө мэдэгдэж байв. Нөгөөтээгүүр, тус улсад коронавирусний халдвар эрчимтэй тархаж буй атал одоогоор 100 гаруй мянган иргэнийг шинжилгээнд хамруулсан. Одоогоор өдөрт дунджаар 1300 орчим иргэн шинээр халдвар авч байна гэсэн тооцоо бий. Гэсэн атал манай улсад 100 мянган ам.долларын эм эмэн бүтээгдэхүүний тусламж өгөхөө мэдэгдсэний шалтгаан тодорхой бус байна. Гэхдээ үүнийг тайлах хэд хэдэн боломжит хувилбар бий юм.

Үүнд, нэгдүгээрт Монгол Улс, БНЭУ хооронд дипломат харилцаа үүссэний 60 жилийн ой энэ жил тохиож буй. Энэ ч утгаараа тусламж дэмжлэг үзүүлэх гэсэн байж мэднэ. Хоёрдугаарт, тус улсаас хөнгөлөлттэй нөхцөлөөр авсан зээлээр газрын тос боловсруулах үйлдвэр байгуулах төсөл хөдөлсөн. Энэ хүрээнд манай улсын 30 орчим мэргэжилтнийг Энэтхэгийн Засгийн газрын тэтгэлэгээр суралцуулахаар болсон.

Тэдний зарим нь ч богино хугацааны сургалтад хамрагдах гэж очоод тэнд гацчихсан байгаа.

Хэрвээ Засгийн газрын тэтгэлгээр, тэр дундаа газрын тос боловсруулах үйлдвэрийн чиглэлээр явсан алба хаагчид халдвар авч, амь насанд нь эрсдэл үүсвэл хоёр улсын хооронд тогтоосон дипломат харилцаанд сэв суухаас гадна ард иргэдэд ч таалагдахгүй нь лавтай. Энэ ч утгаараа асуудлыг зөөлрүүлэх үүднээс, дотоодын асуудлаа үл тоон манай улсад эм, эмэн бүтээгдэхүүн хандивлахаа мэдэгдсэн байж мэдэх юм.

БНЭУ-аас эх орондоо эргэн ирэх хүсэлт 500 орчим иргэн гаргаснаас 300 нь хүүхэд гэдгийг тус улсад суугаа Элчин сайд Г.Ганболд мэдэгдсэн. Эдгээр хүүхдийн эрүүл, аюулгүй байдлыг Энэтхэгийн тал хариуцаж чадах уу гэдэг асуудал мөн л асуудлыг хурцатгах эрсдэлтэй. Энэ ч утгаараа дараагийн тусгай үүргийн нислэг Солонгос уу, эвсэл Австрали уу гэсэн хайчин дундаас Энэтхэг гэсэн сонголт гарч ирэхийг үгүйсгэхгүй гэдгийг албаны хүмүүс хэлсэн юм.

Алин ч бай, эцсийн шийдвэрийг Улсын онцгой комисс гаргана. Бид ч иргэний хувьд уг шийдвэрийг дагаж мөрдөх учиртай. Тиймээс эцсийн шийдвэрийг хүлээе. 

Г.Маргад