Монгол Улсын Шадар сайд, Бүсчилсэн хөгжлийн үндэсний хорооны дарга С.Амарсайхан Монгол улсад суугаа элчин сайдууд, дипломат төлөөлөгчид, олон улсын донор, хандивлагч байгууллагуудын удирдлагуудтай албан уулзалт хийлээ. Уулзалтаар Бүсчилсэн хөгжлийн үзэл баримтлал, Монгол Улсын Засгийн газрын 2024-2028 үйл ажиллагааны хөтөлбөр, бүсүүдийн хөгжлийн төлөвлөгөө, Монгол Улсын урт дунд богино хугацааны хөгжлийн төлөвлөгөө зэргийг танилцуулжээ.
“Монгол Улсын бүсчилсэн хөгжлийн үзэл баримтлал”-ыг 2001 онд Улсын Их Хурлын 57 дугаар тогтоолоор батлан, мөрдүүлснээс хойш 24 жил өнгөрсөн. Энэ хугацаанд Улаанбаатарт нийт хүн амын 48.9 хувь буюу 1.7 сая хүн амьдарч, бүртгэлтэй аж ахуйн нэгжийн 70 хувь, худалдаа үйлчилгээний 84 хувь нь Улаанбаатарт төвлөрчээ. Мөн их дээд сургуулийн 96 хувь, Дотоодын нийт бүтээгдэхүүний 63 хувь нь үйлдвэрлэгдэж хот, хөдөөгийн хөгжил хэт ялгаатай болсон. Тиймээс энэ хэт төвлөрлийг задлах тэнцвэртэй хөгжлийн гарц бол БҮСЧИЛСЭН ХӨГЖЛИЙН БОДЛОГО юм.
Бүсчилсэн хөгжлийн бодлогын хүрээнд бүсүүдийн онцлогт тохирсон хөгжлийн бодлогыг хэрэгжүүлж, хот, хөдөөгийн ялгааг арилгаж, улсын эдийн засаг, нийгэм, байгаль орчны тэнцвэрт байдлыг хангаж, газар нутгийн онцлог, нөөц боломжид тулгуурласан хөгжлийн бодлого, томоохон төсөл хөтөлбөр хэрэгжүүлэхээр зорьж байна. Дэлхийн олон улс Бүсчилсэн хөгжлийн жишгээр хөгжсөн. Манай Улсын Бүсчилсэн хөгжлийн бодлогыг амжилттай хэрэгжүүлэхэд гадны улс орны туршлага, хамтын ажиллагаа нэн чухал юм. Тиймээс өнөөдрийн уулзалтад ирсэн гадны төлөөлөгчид, элчин сайдууд Монгол улсын Бүсчилсэн хөгжлийн бодлогыг дэмжиж байгаагаа илэрхийлж байлаа.
МОНГОЛ УЛС ДАХЬ НҮБ-ЫН СУУРИН ЗОХИЦУУЛАГЧ ЯАП ВАН ХИЕРДЭН "Би энд байгаадаа маш их баяртай байна. Миний бодлоор бүс нутгийн хөгжил бол Монгол дахь ирээдүйг бүтээх гол түлхүүр юм. Мөн хэнийг ч орхигдуулахгүй байх нь маш чухал бөгөөд Нэгдсэн Үндэстний Байгууллагын хувьд энэ бодлогод онцгой ач холбогдол өгч байгаа. Монгол Улсад асар их боломж байгааг харж байна. Монголчууд баялгаа ашиглахын зэрэгцээ байгаль орчинд үзүүлэх нөлөөг багасгаж, хүн бүрт үр өгөөжийг нь хүртээх боломжтой. НҮБ Монгол улсын засгийн газартай хамтран таван жилийн хамтын ажиллагааны хөтөлбөр боловсруулсан. Бидний хүсэж буй зүйл бол алслагдсан бүс нутгийн хүмүүсийн амьдралын чанарыг дээшлүүлж, боловсрол, эрүүл мэндийн үйлчилгээг сайжруулахыг хүсэж байна. Бид Монгол улстай хамтран ажиллах болно" гэв.
ФИОНА БЛАЙТ ИХ БРИТАНИ, УМАРД ИРЛАНДЫН НЭГДСЭН ХААНТ УЛСААС МОНГОЛ УЛСАД СУУГАА ОНЦ БӨГӨӨД БҮРЭН ЭРХТ ЭЛЧИН САЙД "Өнөөдрийн хэлэлцүүлэг маш үр дүнтэй боллоо гэж бодож байна. Монгол Улсын Шадар сайд бүс нутгийн хөгжлийн стратегийг хэрэгжүүлэх чиглэлээр гарсан ахиц дэвшлийн талаар хуваалцсанд баяртай байна. Бид хамтдаа бодлогоо нэгтгэж чадвал Монгол улсад өөрчлөлт авчрах болно гэж бодож байна. Өнөөдрийн хэлэлцүүлэг үүнийг хэрэгжүүлэхэд чухал алхам боллоо. Бүсчилсэн хөгжлийн бодлогыг хэрэгжүүлэхдээ хувийн хэвшлийг татан оруулах нь зөв гэж бодож байна. Их Британи Умард Ирландын нэгдсэн Хаант улс Улаанбаатар хотын метроны төслийг дэмжиж ажиллаж байгаа. Цаашид энэ мэт томоохон төсөл хөтөлбөрүүдэд хамтарч ажиллах болно" гэв.
“Бүсчилсэн хөгжлийн үзэл баримтлал”-ын хүрээнд Хангайн бүсийг Уламжлалт мал аж ахуйн төрөлжсөн, хот байгуулалтын дэд бүс, Баруун бүсийг Эрчим хүчний төрөлжсөн, Байгалийн аялал жуулчлалын дэд бүс, Хойд бүсийг Байгалийн аялал, жуулчлалын төрөлжсөн, аж үйлдвэрийн дэд бүс, Төвийн бүсийг Хөдөө аж ахуйн төрөлжсөн, аж үйлдвэрийн дэд бүс, Зүүн бүсийг Түүхэн аялал жуулчлалын төрөлжсөн, эрчимжсэн хөдөө аж ахуйн дэд бүс, Говийн бүсийг Аж үйлдвэрийн төрөлжсөн, ногоон эрчим хүчний дэд бүс, Улаанбаатарын бүсийг Олон улсын банк, санхүү, бизнесийн хөгжлийн бүс нутаг гэж тус тус тодорхойлсон.
ХЭЛЬМУТ КУЛИТЦ ХОЛБООНЫ БҮГД НАЙРАМДАХ ГЕРМАН УЛСААС МОНГОЛ УЛСАД СУУГАА ОНЦ БӨГӨӨД БҮРЭН ЭРХТ ЭЛЧИН САЙД "Монгол Улс өргөн уудам газар нутагтай, хүн ам сийрэг, харин Улаанбаатар хотод хүн амын хэт төвлөрөл бий болсон. Улаанбаатар хот болон хөдөө орон нутгийн хөгжлийн ялгааг арилгахад энэ Бүсчилсэн хөгжлийн бодлого чухал гэж бодож байна. Монголын хөдөөд байгалийн баялаг байгаа учраас давуу талтай, Эдийн засгийн хувьд ч ашигтай гэж хардаг. Бид бүсчилсэн хөгжлийн бодлогыг дэмжиж байгаа бөгөөд Монгол улстай энэ бодлогыг хамтран хэрэгжүүлэхдээ баяртай байна. Учир нь энэ бол бүс нутгийн хөгжлийг дэмжих шинэ санаачилга юм. Герман улс олон арван жилийн турш Монгол улсын бүхий л салбарт идэвхтэй үйл ажиллагаа явуулж ирсэн. Тодруулбал эрчим хүч, биологийн олон янз байдал буюу байгаль орчны хамгаалал, мөн боловсрол, цахим хөгжил, мэргэжлийн сургалт зэрэг чиглэлээр хамтран ажиллаж байна" гэв.
ШЭНЬ МИНЬЖЮАНЬ БНХАУ-ААС МОНГОЛ УЛСАД СУУГАА ОНЦ БӨГӨӨД БҮРЭН ЭРХТ ЭЛЧИН САЙД "Хятад улс ч мөн адил бүс нутгийн хөгжлийн тэнцвэргүй байдалтай нүүр тулсан. Тиймээс бид улсаа дөрвөн өөр бүсэд хуваан хөгжүүлсэн туршлагатай. Тодруулбал бид улсаа Зүүн эргийн бүс, баруун хойд, төв болон баруун бүс гэж ангилсан. Эхлээд зүүн эргийн бүсийг хөгжүүлж, дараа нь бусад бүсүүдийг дагуулан хөгжүүлэх бодлого баримталдаг. Монгол Улс ч мөн ийм арга барилаар улс орноо бүхэлд нь хөгжүүлэхийг зорьж байгаа гэж би бодож байна. Иймээс Монгол Улс бүсчилсэн хөгжлийн бодлогоо үргэлжлүүлэх нь зөв зам гэж үзэж байна. Нийгмийн бүхий л салбарын хүчин чармайлт, засгийн газар болон орон нутгийн удирдлагуудын томоохон дэмжлэгтэйгээр энэхүү бодлого амжилттай хэрэгжиж, Монгол Улсын тогтвортой хөгжилд чухал хувь нэмэр оруулна гэдэгт итгэлтэй байна" гэв.
Бүсчилсэн хөгжлийн бодлого хэрэгжсэнээр Бүс, орон нутгийн эдийн засгийн чиг үүргийг оновчтой тодорхойлох, Байгалийн нөөц баялгийг зохистой, өгөөжтэй, хүртээмжтэй ашиглаж, хамгаалж, нөхөн сэргээх, Бүс, орон нутагт өндөр технологи, инновацыг нэвтрүүлэх, Бүс дамнасан, салбар хоорондын уялдааг хангасан стратегийн төслүүдийг үе шаттайгаар хэрэгжүүлэх зэрэг олон давуу тал бий болох юм. Түүнчлэн Улсын төсвийн хөрөнгө оруулалт, гадаад зээл, тусламж, орон нутгийн төсөв, төр, хувийн хэвшлийн түншлэлийн хөрөнгө оруулалт болон бусад эх үүсвэрийг оновчтой хуваарилан, бүсүүдийг хөгжлийг дэмжихэд зарцуулахаар төлөвлөж байна.
