Саудын Арабын Эр-Рияд хотод "Esports World Cup 2025" тэмцээн долдугаар сарын 08-аас наймдугаар сарын 24-ний өдрүүдэд зохион байгуулагдаж буй. Уг тэмцээн нь Саудын Арабын Олон нийтийн хөрөнгө оруулалтын сангаас санхүүжүүлдэг ашгийн бус байгууллага болох "Esports World Cup Foundation" (EWCF)-аас жил бүр зохиогддог "Esports World Cup"-ын хоёр дахь удаагийн тэмцээн юм.
Уг тэмцээнд Е-спортын 26 төрөлд тамирчид өрсөлдөж буй. Тэгвэл энэ сарын 20-24-ны өдрүүдэд уг тэмцээний хаалтын хэсэг 1,250,000 ам.долларын шагналын сантай "Counter Strike 2" төрлөөр үргэлжилж байна. Эл тэмцээнд "The Mongolz" багийнхан эхний тоглолтдоо "GamerLegion" багийг, дараах тоглолтдоо "3DMAX" багийг илүүрхэн шөвгийн дөрөв рүү орсон.
Улмаар тэд шөвгийн дөрөвт мөнхийн өрсөлдөгч “Vitality”-гийн эсрэг 11 дэх удаагаа тулах гэж байна. Тулаан бямба гаргийн орой болно. "The Mongolz"-ынхон өмнө нь уг багтай олон таарч ялагдаад байсан ч энэ сарын 17-нд болсон "BLAST Bounty 2025 Season 2 Finals" тэмцээний шөвгийн дөрөвт 2-0-ээр илүүрхсэн юм. Уг тэмцээнд түрүүлсэн баг 500 мянга, үзүүрлэсэн баг 230 мянган ам.долларын шагнал хүртэх ажээ.
Л.Баяр
Сэтгэгдэл (1)