БАРИМТ 1
Ихрийг дотор нь нэг өндгөн эсийн, хоёр өндгөн эсийн гэж ангилах ба хоёроос дээш бол тэр тоондоо хамааран гурав, дөрөв гэхчлэн ялгаатай байдаг байна. Ихэр төрөх нь тийм ч элбэг биш. Эрдэмтдийн судласнаар хоёр ихэр ойролцоогоор 100 төрөлт тутамд нэг, гурван ихэр 800 төрөлт тутамд нэг тохиолдох магадлалтай гэж үздэг аж.
БАРИМТ 2
Дөрөв, түүнээс дээш ихэрлэх нь маш ховор боловч дэлхийн хэмжээнд жилдээ нэгээс хоёр л тэмдэглэгдсэн байдаг гэх. Гэлээ ч анагаахын түүхэнд тэмдэглэгдсэн дөрөв ба түүнээс дээш ихэр хэд хэд байдгаас хамгийн олон нь Геннисийн номонд бичигдсэн 11 ихэр гэнэ. Тэд 1977 онд Бангладеш улсад төрсөн гэдгийг "Гэр бүл" номд дурдсан байдаг байна.
БАРИМТ 3
Ихрүүд өөр хоорондоо ялгахын аргагүй адил, эсвэл тэс ондоо байх нь бий. Ихрүүд нэг өндгөн эсний гэдэг нь нэг ихэснээс салаалсан тус тусдаа хүйстэй байхыг хэлнэ. Ийм ихрүүд хоорондоо маш адилхан, ихэвчлэн хүйс /эр, эм гэсэн үг/ нь ижилхэн байдаг аж. Хоёр өндгөн эсний гэхээр хоёр тусдаа ихэстэй байх бөгөөд хүйс нь өөр өөр, царай зүс нь ч адилхан биш байх хандлагатай.
БАРИМТ 4
Ихрүүдийн эцэг, эхийн аль нэг удамд ихэрлэсэн тохиолдол байсан бол цаашид ч аль нэг үед нь ихэр хүүхэд төрөх магадлал удамшин дамждаг.
БАРИМТ 5
Ихэр хүмүүс хоорондоо адилхан байхаас гадна бас сэтгэл санаа, бие эрхтний талаас нь ямар нэг сэжмээр холбоотой болох нь анзаарагддаг. Үүнийг хүний биеэс ялгарах цахилгаан соронзон үйлчлэлээр тайлбарлах нь бий. Жишээ нь, ихрийн өрөөсөн өвдөхөд нөгөө ихэр нь зовиурлах, өвдөх нь элбэг.
БАРИМТ 6
Ихэр хүүхэд тээсэн болохыг жирэмсэлснээс хойш ойролцоогоор хоёр сарын дараа ЭХО-гоор оношлох боломжтой гэнэ. Түүнээс хойш бол эмч хүүхдүүдийн зүрхний цохилтоор нь ихэр болохыг мэддэг аж.
БАРИМТ 7
Ихэр хүүхэд тээх нь эхийн талаас нэлээд хүндрэлтэй байдаг учир эмчийн хяналтанд орох нь зүйтэй. Ялангуяа төрөх хугацаа ойртсон үед илүүтэй анхаарах нь төрөлтийг ямар аргаар явуулахыг шийдэх ач холбогдолтой.
БАРИМТ 8
Түүнээс гадна ихрүүдийн байрлал төрөхөд саадгүй эсэх, хүй нь тусдаа эсэх гээд зайлшгүй анхаарах олон шалтгаан байдаг байна.
БАРИМТ 9
Сүүлийн үед цөөнгүй гэр бүл ихэр хүүхэд төрүүлэх сонирхолтой болсон нь хуруу шилний хүүхэд гэх шинэ арга нэвтэрсэнтэй холбоотой аж.
