Монгол Улсын Ерөнхийлөгч У.Хүрэлсүх, Хүнс, хөдөө аж ахуй, хөнгөн үйлдвэрийн сайд Ж.Энхбаяр нар “ОБ Пластик” ХХК-ийн сав, баглаа боодлын үйлдвэрийн үйл ажиллагаатай танилцаж, салбарын төлөөлөлтэй уулзлаа. Сав, баглаа боодлын салбарын үндэсний үйлдвэрлэгчид “Хүнсний хангамж, аюулгүй байдал” үндэсний хөдөлгөөний хүрээнд 14 аж ахуйн нэгж хөнгөлөлттэй зээлд хамрагдсан байна. Энэ хүрээнд үйлдвэрлэлийн хүчин чадлаа нэмэгдүүлж, ажлын байрны тоо 2500-д хүргэсэн гэдгийг онцолж байлаа. Ингэснээр дотоодын сав, баглаа боодлын үйлдвэрүүд бүтээгдэхүүний нэр төрлөө өргөжүүлж, Монгол Улсын дотоодын зах зээлийн 50-60 хувийг хангах хүчин чадалтай болжээ.
“ОБ Пластик” ХХК нь хүнсний болон үйлдвэрлэлийн зориулалттай сав, баглаа боодлын бүтээгдэхүүн үйлдвэрлэдэг үндэсний хэмжээний томоохон компани юм. Тус үйлдвэр нь орчин үеийн автомат тоног төхөөрөмжөөр тоноглогдсон, түүхий эдийн зарцуулалт багатай, байгальд ээлтэй дахин боловсруулах боломжтой бүтээгдэхүүн үйлдвэрлэж байна. Үйлдвэрийн хүчин чадал нэмэгдсэнээр импортыг орлох, дотоодын хэрэгцээг хангах бодит боломжууд нээгдэж буйг ХХААХҮ-ийн сайд Ж.Энхбаяр онцолсон юм.
Монгол Улсын Ерөнхийлөгч У.Хүрэлсүх салбарын төлөөлөлтэй санал солилцож, үндэсний үйлдвэрлэгчдээ дэмжих, түүхий эдийн хангамжийг тогтвортой болгох, экологийн шаардлагад нийцсэн сав, баглаа боодлын үйлдвэрлэлийг дэмжих, хог хаягдлыг дахин боловсруулах системийг хөгжүүлэх чиглэлд төрийн бодлого цаашид шат дараатай хэрэгжүүлнэ гэдгийг илэрхийллээ.
Одоогоор Монгол Улсад сав, баглаа боодлын чиглэлээр 50 гаруй аж ахуйн нэгж үйл ажиллагаа явуулж байна. Тус компаниудын төлөөлөл өөрсдийн үйлдвэрлэж буй бүтээгдэхүүний дээжээр үзэсгэлэн гаргаж, Монгол Улсын Ерөнхийлөгч У.Хүрэлсүхэд танилцууллаа.
Сав баглаа боодлын салбар "Хүнсний хувьсгал" үндэсний хөтөлбөрт хамрагдсанаар хүнсний ногооны хуванцар тэвшний үйлдвэр шинээр ашиглалтад орж, ажлын байрны талбай 6156 м2-аар нэмэгджээ. Компаниудын эргэлтийн хөрөнгө 20 хувь, борлуулалтын орлого 18 хувь, бүтээгдэхүүний нэр төрөл дунджаар 15-аар нэмэгдсэн гэж байв. Тэдний зүгээс дотоодод үйлдвэрлэж буй ижил төрлийн импортын барааны босго тогтоох, хүний нөөц мэргэжилтэн бэлтгэх, хууль эрх зүйн орчныг сайжруулах, түүхий эдийн импортын хамаарлыг багасгах, хүнсний зориулалтын бус савны хэрэглээг бууруулахыг хүссэн юм.
Үйлдвэрлэлийн дотоодын хэрэгцээ жил бүр өсөн нэмэгдэж буй энэ үед үндэсний үйлдвэрлэгчдийн технологийн шинэчлэл, бүтээгдэхүүний чанарын өсөлт, байгаль орчны стандартад нийцсэн шийдэл нь Монгол Улсын үйлдвэрлэлийн салбарын өрсөлдөх чадварыг нэмэгдүүлэх чухал алхам болж байна.
