Хотын дарга С.Амарсайхан цаг үеийн асуудлаар ээлжит мэдээлэл хийлээ. 

Тэрбээр "Ой хээрийн түймрээс урьдчилан сэргийлэх чиглэлээр эргүүл хийж буй газруудад амралтын хоёрхон өдөрт 25 зөрчил бүртгэгдсэн. Айл өрхүүдэд гал түймрийн аюул осолд өртөх эрсдэл өндөр байна.

Тухайлбал, эргүүлийн хугацаанд Сүхбаатар дүүргийн Өвөрсогоотын аманд зургаан га газар, Чингэлтэй дүүргийн XIX хороо, Яргайтын задгайд нэг га газар, Хан-Уул дүүргийн VIII хороо Жаргалантын аманд 2.5 га газар, Хан-Уул дүүргийн XI хороо Соёмботой уулын 10 га газар, Баянзүрх дүүргийн XI хороо Сүүл даваанд зургаан га газарт гарсан ой хээрийн түймрийн дуудлага дээр нийт 265 алба хаагч цаг тухайд нь очиж ажилласан байна.

Мөн өчигдөр Хан-Уул дүүргийн нутагт орших Зайсангийн аманд 2.5 га газар, Арцатын аманд найман га газар гал түймэрт өртсөн. Галт түймрийн дуудлагаар нийт 86 алба хаагч очиж ажилласан.

Хаврын хуурайшилт ихтэй, гал түймрийн аюул учирч болзошгүй тухай иргэдэд байнга зөвлөж, уриалж байгаа ч харамсалтай нь, зарим иргэд хуучин хувцсаа шатаах, татсан тамхиа бүрэн унтраахгүй байх, санамсаргүй болгоомжгүй зэргээс болж ой хээрийн түймэр дэгдэж байна. Ингэснээр халдварт өвчинтэй тэмцэж байгаа энэ үед Онцгой байдлын алба хаагчдад ихээхэн ачаалал үүсгэж байна. Тиймээс иргэд сонор сэрэмжтэй байх шаардлагатай байна.

Энэ ташрамд хэлэхэд, өчигдөр Богд ууланд гарсан гал түймэр унтраахад  Авто мотоциклын клуб, иргэд оршин суугч, залуус олон зуугаараа ирж алба хаагчдад тусалж, эх оронч сэтгэлээр дэмжиж ажилласанд талархал илэрхийлье. Ямар ч цаг үед бэлэн байдаг Авто мотоциклын клубынханд талархаж байна" гэлээ. 

А.Сүх