ЭМЯ-наас цаг үеийн асуудлаар мэдээлэл хийлээ. Энэ үеэр ХӨСҮТ-ийн Тандалт, судалгааны албаны дарга А.Амбасэлмаа “Халдвар тархсан дөрвөн сарын хугацаанд шаардлагатай арга хэмжээ авч ажиллаж байна. Энэ хүрээнд УОК-ын Шуурхай штабын дэд ажлын хэсэг ажиллаж байна. Бүрэлдэхүүнд тагнуул, цагдаа, мэргэжлийн хяналт, Зооноз өвчин судлалын зэрэг шаардлагатай байгууллагын алба хаагчид 24 цагаар ажиллаж байна. Үүнээс 10 баг голомтод ажиллаж байна.

Нийт долоон удаагийн чартер онгоц хүлээж авсан. Мөн хилийни боомтоор орж ирсэн 4000 гаруй иргэнд тандалт судалгаа хийсэн. Үүний хүчинд эх орондоо халдвар тархаахгүй барьж чадлаа. Давтагдсан тоогоор 10 гаруй вирус судлалын шинжилгээ хийсэн. Үүнээс 38 батлагдсан тохиолдлыг илрүлсэн.

Өвсөн дотроос зүү эрэхтэй адил бид ажиллаж байна.

Эдгээрийг эмчилсэн. Есөн иргэн нь эдгэрсэн. Эдгээрийн биеийн байдал маш хүнд, хүнд, хүндэвтэр байдалтай байсан. Халдвар авсан хүмүүсээс 1-15 хоногийн дараа халдвар авсан гэдгийг баталж тогтоосон. 20-иод хүн нь эмнэл зүйн шинж тэмдэг илрээгүй байсан.  

Тусгаарлах байранд байгаа иргэдээс явцын тандалт хийж байна. өнөөдрийг хүртэл хийсэн тандалтаас 300 орчим сэжигтэй тохиолдол илэрсэн. Үүнээс батлагдсан тохиолдол илрээгүй. Эдгээр хүмүүс нь амьсгалын замын өвчин буюу хатгаа, ханиадтай байсан. Долоо хоногт 100-120 хүн шинжилж байна” гэлээ.