УОК-оос цаг үеийн асуудлаар мэдээлэл хийлээ. Энэ үеэр Онцгой байдлын ерөнхий газрын тэргүүн дэд дарга бөгөөд штабын дарга, бригадын генерал Г.Ариунбуян “УОК-ын хуралдаанаас өндөржүүлсэн бэлэн байдлын хугацааг сунгах асуудлыг Засгийн газарт танилцууллаа. Засгийн газрын хуралдаанаар өндөржүүлсэн бэлэн байдалд шилжүүлсэн хугацааг ирэх сарын 31-нийг хүртэл сунгах саналыг дэмжлээ. Шалтгаан нь БНХАУ-д халдварын тохиолдол буурч байгаа боловч ОХУ-д өвчлөл нэмэгдэж байна. Өдөрт 5000 гаруй нэмэгдэж байна. Дээр нь тус улсад суралцдаг байсан 21 оюутнаас халдвар илэрсэн. Мөн 34, 35 дахь тохиолдол нь олон улсын ачаа тээвэр хийдэг жолооч болон түүний гэр бүлийн хүнээс илэрсэн.

Энэ утгаараа ОХУ-аас зөөвөрлөгдөн ирэх тохиолдол ихсэх магадлалтайг харуулж байна.

Гадаад дахь иргэдээ татан авах ажиллагаа үргэлжилж байна. Маргааш буюу дөрөвдүгээр сарын 30 болон ирэх тавдугаар сарын 1-нд БНСУ-ын Сөүлээс, тавдугаар сарын 2-нд Франкфуртаас нийт 790 гаруй иргэн татаж авна. Бэлтгэл ажил бүрэн хангагдсан. Нэрсийг сонгохдоо Элчин сайдын яамнаас ирүүлсэн нэрсийг УОК-оос нягталж үзсний үндсэн дээр эцэслэж, МИАТ компанид хүргэсэн.

Одоогоор 35 улсаас 9900 орчим иргэн эх орондоо ирэх хүсэлт гаргасан. Үүнд хөгжлийн бэрхшээлтэй, өндөр настан, жирэмсэн, бага насны хүүхэдтэй иргэдийг нэн тэргүүнд авчирна. Сүүлийн өдрүүдэд бүртгэлтэй холбогдуулан БНСУ дахь Элчин сайдын яамны үүдэнд жагсаал хийх, дипломат алба хаагчдын нэр төрд халдах зэргээр зохисгүй үйлдэл гаргаж байна. Иргэдээ хандаж хэлэхэд Элчин сайдын яамны ажилтнуудын өдөр тутмын ажилд саад учруулахгүй байх, хүндэтгэлтэй хандахыг УОК-оос анхааруулж байна.

УОК-ын дарга Ө.Энхтүвшины тушаалаар “Амны хаалтаа зүүцгээе” аяныг өрнүүлж байна. Иргэд идэвхтэй оролцож байгаад баярлалаа. Нийт 59 төрийн байгууллагын алба хаагчид хяналт тавин ажиллаж байна” гэлээ.