УОК-оос мэдээлэл хийлээ. Энэ үеэр МИАТ ТӨХК-ийн гүйцэтгэх захирал Д.Баттөр “УОК-оос манай байгууллагад хэд хэдэн санал ирсэн. “Хүннү Эйр” компани Энэтхэг улс руу чартер нисгэх санал хүргүүлсэн асуудалд би хариулт өгөх боломжгүй. Хамгийн гол нь Улаанбаатар-Франкфурт чиглэлийн онгоцны тийз өндөр үнэтэй байна гэдэг зүйл яригдсан. Энэ чиглэлийн нислэг зургадугаар сарын сүүлээр эхэлдэг байсан. УОК-оос гаргасан шийдвэрийн дагуу Берлины нислэгийг Франкфурт руу шилжүүлсэн. Энэ нислэгээр ирэх иргэдийн 50 гаруй хувь нь манай үйлчлүүлэгч. Өөрөөр хэлбэл, Берлин чиглэлд тийзтэй байсан зорчигчид. Зарим нь зуны нислэгийн тийзийг урьдчилж авсан байсан. Эдгээр хүмүүс нислэгээ нааш нь татаж байгаа. Үлдсэн 40 гаруй хувь нь тийз шинээр авсан зорчигч. Тийзний үнэ ханшны хувьд 700 евро дээр татвар нэмэгдэж байгаа. Энэ тариф нь 2015 онд батлагдсан. Энгийн ангиллын 10 төрлийн тариф байдаг. Хамгийн хямд нь 400 еврогоос эхэлдэг. Хамгийн үнэтэй нь 905 евро. Тэгэхээр 720 евро бол дунджаас арай дээгүүр ханш юм.

Ийм үнээр тийз авсан иргэд нь нэгдүгээрт, МИАТ-ийн зорчигч биш, хоёрдугаарт, эрэлт ямар байгааг бүгд мэднэ. Гуравдугаарт, зөвхөн нэг талдаа зорчигчтой яваа учраас хуучин тарифаар нислэг үйлдэхээр болсон.

Бас нэг асуудал байсан нь Сөүлээс ирэх онгоцны тийз зарна гэсэн зар цахим орчинд тархсан. Энэ бүгд хуурамч мэдээлэл гэдгийг анхааруулъя. Хуулийн байгууллагаас шалгаж байна.