Орон байргүй, тэнэмэл иргэдэд зориулсан тусгай орон сууц барихаар болсон тухай хотын захирагч С.Амарсайхан мэдэгдлээ. Тэрбээр "Орон байргүй тэнэмэл 850 иргэн бий. Тэдгээрийг тусгаарлах байранд хамруулж, ариутгал ариутгал хийх, хоол хүнсээр хангах зэрэг ажил хийсэн. Эдгээр иргэдийн 80 гаруй хувь нь эрэгтэй, үлдсэн нь эмэгтэй. Судалгаагаар дунджаар 1.6 жил гадуур тэнэж байна. Мөн 46 хувь нь 18-40 насны хөдөлмөрийн насны хүмүүс байна.

Тусгай төвд 150 иргэн хамрагдаж, үйлчлүүлж байна. Тусгай төв нь НЗДТГ-ын дэргэд үйл ажиллагаа явуулдаг. Орон гэргүй, тэнэмэл иргэдийг байршуулдаг.

Тиймээс орон байргүй эдгээр иргэдийг байрлуулах тусгай орон сууц барих ажлыг энэ оноос эхлүүлэхээр болсон.

Ингэхдээ Улаанбаатар хотын суурьшлын бүсийн гадна байгуулна. Хөдөлмөрийн насныхан учир зөвхөн тусгаарлаж байгаад гаргадаг биш ажил хийлгэдэг, мэргэшүүлдэг байхаар төлөвлөсөн. Өөрөөр хэлбэл, байнга тэнд амьдаруулдаг, нийслэлийн бүтээн байгуулалтад гар бие оролцох боломжийг олгоно. Магадгүй ногоо, мод тарьдаг ажил хийлгэх, зам талбай цэвэрлүүлэх зэргээр хөдөлмөр эрхлүүлэх замаар нийгэмшүүлнэ. Тиймээс орон сууц барих ажлыг эхлүүлж байна. Мэргэжлийн байгууллагаас хяналт тавьж ажиллана. Нийт 1905 м.кв талбай бүхий орон сууц барьж 250 иргэнийг байршуулна" гэлээ.

Г.Маргад