Шинэ төрлийн коронавирусний халдварын тархалтын талаар ЭМЯ-аас ээлжит мэдээллээ хийлээ. Энэ үеэр ЭМЯ-ны Гадаад харилцаа, хамтын ажиллагааны хэлтсийн дарга Б.Янжмаа “Дэлхий нийтэд коронавирусээр 3.5 сая хүн халдварлаад байна. Үүнээс 1.1 сая хүн эдгэрч, 251 мянган хүн нас барсан гэсэн мэдээлэл өгсөн. Тохиолдлын тоогоор АНУ, Испани, Итали, Франц, Их Британи, Бразил, ОХУ зэрэг улсууд тэргүүлж байна. Бразилд өнгөрсөн долоо хоногт халдварын тоогоор БНХАУ-г давсан. Мөн Чили улсад шинээр 980 тохиолдол бүртгэгдэж халдвар хурдацтай тархаж байна. Япон улсад 20 нас  баралт, 196 шинэ тохиолдол нэмэгдсэн. Хөл хориог тавдугаар сарыг дуустал үргэлжлүүлнэ гэдгийг тус улсын Ерөнхий сайд мэдэгдсэн" гэлээ.  

ЭМЯ-ны Эмнэлгийн тусламж үйлчилгээний хэлтсийн дарга Я.Буянжаргал “Сүүлийн гурван тусгай үүргийн онгоцоор 821 иргэн ирсэн. Үүнээс ХӨСҮТ-д сэжигтэй 45 хүнийг, тусламж үйлчилгээ шаардлагатай 56 хүнийг Цэргийн төв эмнэлэгт тусгаарласан. Улсын хэмжээнд тандалт судалгаа үргэлжилж байна. Маргаашнаас эхлэн гурван өдөр улсын хэмжээнд дадлага сургуулилт хийхээр төлөвлөсөн. Мөн тусгай үүргийн онгоц, тээврийн хэрэгслээр эмнэлгийн тусламж үйлчилгээнд нэн шаардлагатай байгаа хамгаалах хэрэгсэл, тоног төхөөрөмжийг татан авах ажлыг хийж байна. ОХУ-аас оюутнууд хамгаалах хувцастай ирж байгаа гэсэн. Ирэх үед нь тусгаарлах байр бэлэн. Батлагдсан журмынх нь дагуу шийдвэрлэнэ" гэлээ. 

А.Сүх