Эрүүл мэндийн яамнаас ээлжит хэвлэлийн хурлаа хийлээ. Мэдээллийн эхэнд ЭМЯ-ны хэлтсийн дарга Д.Нарангэрэл "Өнөөдрийн байдлаар 1042 хүн ажиглалтад байна. 12 хүн ажиглалтаас гарсан. Нийт 135 эмч, эмнэлгийн мэргэжилтэн тусгаарлалтад байгаа иргэдэд үйлчилж байна. Өнөөдрөөс эхлэн гурав хоногийн хугацаанд ЭМЯ, цагдаа, онцгой, мэргэжлийн хяналтынхан алба хаагчид хамтын үзүүлэх сургуулилт хийж байна. Энэ үеэр гэнэтийн дуу чимээ гарна. Иргэдийн зүгээс халдвар гарлаа гэж цочирдохгүй байхыг хүсье" гэлээ.
ЭМЯ-ны Гадаад харицлаа, хамтын ажиллагааны хэлтсийн дарга Б.Янжмаа "Сүүлийн 24 цагийн байдлаар ОХУ-д 10.1 мянга шинэ тохиолдол илэрч, 95 нас баралт бүртгэгдлээ. Ингэснээр тус улсад нийт тохиолдол 155 мянга гаруй болж, 1451 хүн эндээд байгаа юм. Бразилд 7000 гаруй шинэ тохиолдол нэмж бүртгэгдсэн. Нийт 114 мянга болж шинэ тохиолдол өмнөх өдрөөс 6.4 хувиар нэмэгдсэн байна. АНУ-д 1.2 сая хүн халдвар авснаас 71 мянган хүн эндлээ. Улмаар тус улсын 50 мужийн 46-д нь хичээлийн үйл ажиллагааг хаажээ.
Мөн БНСУ-д сүүлийн хоёр өдөр дараалан дотоодод шинэ халдвар бүртгэгдээгүй. Гаднаас зөөвөрлөгдөн ирсэн гурван тохиодол бүртгэгдсэн байна. Харин Японд 120 шинэ тохиолдол бүртгэгдсэний 58 нь Токио хотод гарсан. Нас баралт өмнөх өдрөөс 10-аар нэмэгдсэн гэсэн мэдээлэл өгсөн. Илрүүлгийн хувьд тус улсын лабораторийн шинжилгээ хийх шаардлага хэт өндөр байгааг өөрчлөх шаардлагатай гэжээ. Тухайлбал, дөрвөн өдөр дараалан өндөр халуурсан иргэнд шинжилгээ хийдэг байсан бол амьсгал давчдах зэрэг шинж тэмдэг илэрсэн тохиолдолд шинжилгээ хийдэг байхаар болжээ. Ингэснээр халдварыг эрт илрүүлдэг болно" гэж үзжээ.
А.Сүх
