Эрүүл мэндийн яамнаас ээлжит хэвлэлийн хурлаа хийлээ. Энэ үеэр ЭХЭМҮТ-ийн захирал Ш.Энхтөр “ЭХЭМҮТ бэлэн байдлыг хангах хүрээнд хэд хэдэн ажлыг хийж байна. Цаг үеийн нөхцөл байдлаас хамаарч тодотгол хийн ажиллаж байгаа юм. Юуны өмнө нөөц бэлдэх ажил хамгийн чухал байна. Тиймээс нөөцийг тасралтгүй үргэлжлүүлэн төвлөрүүлэх дөрвөн сарын төлөвлөгөө хийгдсэний дагуу ажиллаж байна.

ЭХЭМҮТ болзошгүй нөхцөлд хүүхдийн эрчимт эмчилгээний найм, ердийн тохиолдлын 71 ор бүхий тасаг нийт 83 орыг дэлгэж ажиллахаар тооцоо судалгаа хийсэн. Өнөөдрийн байдлаар гурван ор бүхий тусгаарах гурван орыг бэлдсэн. Мөн үүнтэй холбогдуулан 12 сургалт сурталчилгааны ажил зохион байгууллаа.

Түүнчлэн ЭХЭМҮТ-ийн 18 эмч сэжигтэй 28 тохиолдол дээр очиж ажилласан. Энэ хугацаанд долоон сэжигтэй тохиолдол орж ирсэн. Улмаар ХӨСҮТ-тэй хамтран ажиллаж, сэжигтэй тохиолдол үгүйсгэгдсэн учраас эмчилгээ үйлчилгээ үзүүлээд явуулсан. Болзошгүй халдварын дэгдэлтийн үед хүний нөөц туйлын чухал байна. Энэ хүрээнд 2013-2019 онд тэтгэвэртээ гарсан зарим хүмүүстэй гэрээгээр ажиллахаар болсон. Мөн ЭХЭМҮТ-ийн Төгсөлтийн дараах хүмүүстэй гэрээгээр хамтран ажиллахаар болсон” гэлээ.

А.Сүх