М-Си-Эс Групп улс орныхоо эдийн засгийн өсөлтөд дорвитой хувь нэмэр оруулахын зэрэгцээ эрүүл мэнд, боловсролын чанар, хүртээмжийг сайжруулах, инноваци, дэд бүтцийг хөгжүүлэхэд тууштай хөрөнгө оруулж хүн, нийгэм, хүрээлэн буй орчинд ээлтэй үйл ажиллагаа явуулахыг эрхэмлэн ажилладаг билээ. Боловсролын чанар, хүртээмжийг сайжруулах ажлын хүрээнд өнгөрөгч 2019 онд нийт 360 сая гаруй төгрөгийг нийслэл хот болон орон нутгийн цэцэрлэгийн хүүхдүүд, ерөнхий боловсролын энгийн болон тусгай сургуулийн сурагчид, оюутан, залууст чиглэсэн төрөл бүрийн хөтөлбөрийг санаачлан хэрэгжүүлэхэд зарцуулсан байна.

Түүнчлэн, залуу хойч үеийнхэндээ зөв мэдлэг түгээх, эх хэлнийхээ дархлааг бататгах, үсэг бичгийн асуудлуудыг цэгцлэхэд хувь нэмэр оруулах зорилгоор “Үндэсний үсэглэлийн аварга” нэвтрүүлгийг санаачлан, ерөнхий ивээн тэтгэгчээр Номадиа Пикчерс, Боловсрол телевизтэй хамтран ажиллалаа. Нидерланд улсын “Endemol Shine” группийн албан ёсны эрхтэй “Үндэсний үсэглэлийн аварга” шоу нэвтрүүлэгт хот, хөдөөгийн 1000 гаруй сурагч бүртгүүлснээс шилдэг 52 оролцогч шалгаран эхний улирлын нэвтрүүлэгт оюун ухаанаа сорин оролцсон юм. Нийт 9 цувралын турш эх хэл, өв соёлоо тээн дэлгэрүүлэхийн чухлыг хөндөж, монгол хэлний зөв бичгийн дүрэм, үгийн сангийн тухай маргаан, хэлэлцүүлгийг өрнүүлж, улмаар нийгэмд эерэг нөлөө, үр дүн үзүүлж чадсан энэхүү нэвтрүүлгийн эхний улирлын аваргаар Соёмбо бага сургуулийн 5-р ангийн сурагч М.Түвшинзаяа тодорч аваргын цом, 10 сая төгрөгийн эзэн болсон билээ.