Сонгуулийн тухай хуулийн дагуу нэр дэвшигчдийн сурталчилгааны өдөр албан ёсоор эхэллээ. Энэ хүрээнд СЕХ-оос нэр дэвшигчдийн үнэмлэхийг нь гардуулж байна.
2020 оны УИХ-ын сонгуульд 14 нам, эвсэл 121 бие даагч гээд нийт 639 нэр дэвшигч өрсөлдөж байна. Сонгуульд 121 хүн бие даан өрсөлдөж байгаа нь хамгийн их бие даагчтай сонгууль болох гэж байгаагаараа онцлог. Нийт нэр дэвшигчдийн 378 нь орон нутагт, 261 нь нийслэлийн тойргуудад өрсөлдөж байгаа юм. Мөн одоогийн УИХ-ын гишүүдээс 52 нь сонгуульд нэр дэвшээд байна.
Улс төрийн намуудаас АН болоод МАН 29 тойрогт 76 нэр дэвшигчээ дэвшүүлээд буй. Та бидний эвсэл, Шинэ эвсэл-ээс мөн 76 хүнийг нэр дэвшүүлсэн. "Зөв хүн электорат эвсэл"-ээс 59, "Эрх чөлөөг хэрэгжүүлэгч нам"-аас 13 тойрогт 16 нэр дэвшигч, "Эх орончдын нэгдсэн нам"-аас нэг, "Дэлхийн монголчууд нам"-аас нэг, "Хөгжлийн хөтөлбөр нам"-аас долоо, Сахигтун! Үндсэн хуулийн 19 эвсэл 70, "Зон олны нам"-аас 30, "Ард түмний олонхийн засаглал нам 25, "Гэр хороолол хөгжлийн нам"-аас таван нэр дэвшигч найман дахь удаагийн парламентыг сонгох ээлжит сонгуульд оролцоно.
СЕХ цар тахлын үеийн зөвлөмжийг баримталж нэр дэвшигчдийн үнэмлэхийг гардуулахдаа олон хүн цуглуулахгүй байх бодлого баримталж байгаа аж.
Өнөөдөр ийнхүү бүх нэр дэвшигчид үнэмлэхээ гардан авснаар 2020 оны сонгуулийн сурталчилгаа албан ёсоор эхлэж байна.