Ирэх дөрвөн жилийн хувь заяагаа шийдвэрлэх чухал алхам хийхэд гурав хоногийн хугацаа үлджээ. Сонгуулийн санал хураалт тулсан энэ хугацаанд зарим нь байр сууриа хадгалж үлдэх, зарим нь эрх мэдэлд хүрэхийн тулд өмнөх өдрүүдээс илүү идэвхтэй ажиллах нь ойлгомжтой. Тэд 639-үүлээ. Үүнээс ердөө 76 нь барианд орох юм. Тэдний дунд жагсагчаас эхлээд төрөл бүрийн мэргэжилтэй хүн бий. Тиймээс дараагийн дөрвөн жилээ шийдүүлэх гэж байгаа иргэд бидний хувьд саналаа хэрхэн өгөх нь чухал алхам болох юм. Ингээд энэ долоо хоногт нийгэм, эдийн засагт өрнөсөн онцлох үйл явдлуудаас тоймлон хүргэе.

Хүүхэд нас, гэгээн үеэ хөтлөн харгислал руу алхаж буй бидний ирээдүй

Хүүхэд нас. Мөрөөдлөөрөө жигүүр хийн хорвоогийн бүхий л зүйлстэй анхлан танилцаж буй хамгийн гэгээн үе. Яг л үүн шиг. Энэ насанд хүүхэд бүр өдөржин, шөнөжин ханатлаа тоглож, зугаацах юмсан гэсэн чин хүсэл тээдэг нь үнэн.

Яг л энэ л насанд нь сүүдэр хургах учиргүй. Тэдний чин хүсэл, зориг мохох учиргүй ч сүүлийн жилүүдэд бид боловсрол талдаа хэт анхаарч харин хүн байхын утга учрыг гээгдүүлж буй мэт.

Ерөөс хүнлэг чанараа гээж орхиж.

Нулимсандаа халтардаж, хоёр алгаа дэвсэн харгис эцгийнхээ, халамжгүй эхийнхээ гарын шүүс болохгүйн тулд арга буюу гуйлга гуйж, уйлан дуулан суугаа хүүхдүүдийн хажуугаар өр өвдөх нь битгий хэл, жишим ч үгүй бид зөрдөг. Бид ийм л болсон. Хүүхдээ эрхлүүлээд зөрдөг. Муухай хараад зөрдөг. Яг л ийм байдлаар бид хүнлэг чанараа өдөр өдрөөр гээсээр байна.

Хүүхдийн хүмүүжилд гэр бүлийн харилцаа чухал гэж ярьдаг ч хүүхдийнхээ дэргэд хэрүүл маргаангүй, элдэв хараал хэлэхгүй ярилцаж үзсэн бил үү гээд бодоод үзээрэй. Хүүхэд бол ээж аавын толь, тусгал. Хүчирхийлэлд өртөж байсан эсвэл хүчирхийлэлтэй орчинд өссөн хүүхэд хүчирхийлэгч болдог гэдгийг сэтгэл зүйчид ч нотолдог. 

Саяхан гэхэд цахим бүлжээгээр 14 настай охиныг тоглоомын талбай дээр мөн ижил насны зургаан хөвгүүн нүүр нүдгүй, хайрлалгүй дэвсэлж буй элэг эмтрэм, халагламаар бичлэг цацагдав.

Бид юун дээр алдчихав аа. Эмэгтэй хүнийг хүндэлдэг, эмзэг юм гэж хайрладаг хүнлэг ёсоо хаана гээчихэв.

Түүнийгээ бид хаймаар байна. Олж аваад нандигнамаар байна. Үеийн охиноо харгисаар зодож буй хөвгүүдийг буруутгахаас эхлээд бид өөрсдөөсөө, нийгмээсээ бурууг хайцгаая. 

Д.Сүнжид: Танд шаардлагатай байгаа зүйлийг бодлогын түвшинд хэрэгжүүлж чадах нэгнийг сонгоорой

Нээлттэй нийгэм форум, Хүний эрхийн Үндэсний комисс хамтран зохион байгуулдаг “Хүний эрхийн тухай ярилцъя” ээлжит уулзалт “Сонгох эрх ба залуусын оролцоо” сэдвээр боллоо. Энэ үеэр хуульч Д.Сүнжид “Та өөрийнхөө байгаа орчиндоо сэтгэл хангалуун байна уу гэдгийг залуус өөрсдөөсөө асуугаад үзээрэй. Олон хариулт мэдээж гарна. Таны дутаад байгаа бүхнийг бодлогын түвшинд хийж, хэрэгжүүлж чадах тэр хүнийг л сонго гэж хэлмээр байна. Хоёрдугаарт, өмнө нь сонгож байсан хүмүүсээс асуух асуух нь тодорхой. Юу гэж амалсныг нь харж болно. Тухайлан юу хийсэн гэдгийг нь асуух хэрэгтэй. Байхгүй бол сонгох шаардлага байна уу гэдгийг бодох хэрэгтэй” гэдгийг онцолсон юм.

АТГ: Ашиг сонирхлын зөрчил үүсч болохуйц 13 нэр дэвшигчийн урьдчилсан мэдүүлгэ байна
Авлигатай тэмцэх газар 2020 оны зургадугаар сарын 8-12-ны өдрүүдэд нийтийн албанд томилогдохоор нэр дэвшсэн 276 хүний хувийн ашиг сонирхлын урьдчилсан мэдүүлгийг хянан шийдвэрлэжээ.

Өнгөрсөн долоо хоногт 272 мэдүүлэг шинээр хүлээн авсан бөгөөд нийт 370 урьдчилсан мэдүүлгийг хянан үзсэн байна. Хянан шийдвэрлэсэн 276 мэдүүлгээс ашиг сонирхлын зөрчил үүсэх нөхцөл байдал тогтоогдоогүй 255, хууль журамд заасан үндэслэлээр буцаасан найм, ажлын байрны тодорхойлолт болон хуульд заасан шаардлага хангаагүй, ашиг сонирхлын зөрчил үүсч болохуйц нөхцөл байдлыг тогтоож 13 нэр дэвшигчийн урьдчилсан мэдүүлэгт анхааруулсан хариу өгсөн аж. Одоогоор ажиллагаанд 97 нэр дэвшигчийн урьдчилсан мэдүүлэг хянагдаж байна.

АХБ-ны 30 сая ам.долларын санхүүжилтээр Замын-Үүд чөлөөт бүсийг хөгжүүлнэ

АХБ-ны 30 сая ам.долларын санхүүжилтээр Замын-Үүд чөлөөт бүсийг хөгжүүлнэ
Монгол Улс болон БНХАУ-ын хооронд байгуулахаар төлөвлөж буй эдийн засгийн хамтын ажиллагааны бүсийн чухал бүрэлдэхүүн болох “Замын-Үүд” чөлөөт бүсийг хөгжүүлэхэд зориулан 30 сая ам.долларын зээлийн санхүүжилтийг Азийн хөгжлийн банк (АХБ) шийдвэрлэжээ.  

“Замын-Үүд” чөлөөт бүс нь хөл хөдөлгөөн ихтэй олон улсын хилийн боомтын зэргэлдээ оршдог тул тухайн орон нутгийн эдийн засаг төдийгүй иргэдийн амьжиргаа нь хил дамнасан худалдаа наймаа, түүний эргэлтээс ихээхэн хамааралтай байдаг.

2025 оны 12-р сард хэрэгжиж дуусах энэхүү төслийн нийт өртөг 35.76 сая ам.доллар бөгөөд үүнээс  5.76 сая ам.долларыг Монгол Улсын Засгийн газраас санхүүжүүлэх юм.

Б.Лхам