Төв аймаг дахь Эрүүгийн хэргийн анхан шатны шүүхэд өнөөдөр 09.00 цагаас ТЕГ-ын дарга асан Б.Хурц, УЕП-ын орлогч асан Г.Эрдэнэбат нарын есөн хүнийг шүүх хурал эхэлсэн ч хойшлогдлоо. 

Уг шүүх хуралд төр, нийгмийн зүтгэлтэн С.Зориг агсны амь насыг хөнөөсөн хэргийг илрүүлэх явцад Б.Содномдаржаа, Т.Чимгээ нарт эрүү шүүлт тулган, тарчлан зовоох ажлыг гүйцэтгэсэн ялтан Ц.Амгаланбаатарыг гэрчээр оролцуулахаар товлосон байсан юм.

Өмнөх шүүх хуралдаанаар улсын яллагч О.Мөнх-Од нь Эрүүгийн хэрэг хянан шийдвэрлэх тухай хуулийн 10.3 дугаар зүйлд заасны дагуу Төв аймаг дахь эрүүгийн хэргийн анхан шатны шүүхийн нийт шүүгч болон шүүх бүрэлдэхүүнээс татгалзаж хойшлуулж байсан юм. 

Шүүх хуралд хошууч генерал Б.Хурц болон бусад шүүгдэгчид бүгд ирсэн бөгөөд тэднийг Т.Содномдаржаа, Б.Чимгээ нарыг эрүүдэн шүүсэн, гүйцэтгэх ажлын журам зөрчсөн зэрэг хэргээр шалгаж, яллах дүгнэлт үйлдэн ийнхүү шүүж буй юм.

Уг хэрэг одоогоос жилийн өмнө нэр бүхий УИХ-ын гишүүдийн хараанд өртөж, парламентийн гишүүдэд хаалттай байдлаар үзүүлсэн юм. Ингэснээр олон нийтэд уг бичлэгийг үзүүлснээр хорих ангид эрүүдэн шүүлт байдаг, Б.Содномдаржаа, Т.Чимгээ нарыг эрүүдэн шүүсэн болох нь нийгэмд ил болсон.

Гэвч уг бичлэгийг С.Зориг агсны амь насыг хөнөөсөн хэргийг илрүүлэхдээ нотлох баримтад хавсаргаж, биежүүлэх зорилгоор бичсэн гэх мэдээлэл байна.

Тодруулбал, олон нийтэд задарсан бичлэгийн ихэнх хэсгийг Т.Чимгээ, Б.Содномдаржааа нарт холбогдох хэргийг шүүсэн шүүх хуралд үзүүлжээ. Ингэснээр тэднийг хэргээ хүлээсэнд тооцож, ял оноосон бололтой. 

Өнөөдөр болж буй шүүх хурлаас уг асуудалтай холбогдуулан хошууч генерал Б.Хурц тэргүүтэнг шүүж буй. Хэрвээ тэднийг гэм буруутай гэж үзвэл, Зориг агсны амь насыг хөнөөсөн хэргээр ял эдэлж буй ялтан Т.Чимгээ, Б.Содномдаржаа нар суллагдах магадлал нэг хувиар нэмэгдэх магадлалтай.