Эрүүл мэндийн яамнаас цаг үеийн асуудлаар ээлжит мэдээллээ хийлээ. Энэ үеэр ХӨСҮТ, Дархан-уул аймгийн хоёр лабораторид 194 хүний сорьцод шинжилгээ хийхэд коронавирус илрээгүй гэдгийг ХӨСҮТ-ийн захирал Д.Нямхүү онцоллоо. Түүний хэлснээр энэ сарын 2-нд Улаанбаатар-Сөүл чиглэлийн тусгай үүргийн онгоцоор ирсэн 144 хүний сорьц, ажиглах байранд байгаа таван хүний давтан шинжилгээ хийхэд, тандалтын зорилгоор Интермед эмнэлгийн нэг сорьцод шинжилгээ хийхэд халдвар илрээгүй байна.
Мөн өнөөдөр хоёр хүн эдгэрчээ. Тодруулбал, тавдугаар сарын 29-нд сорьц батлагдсан ОХУ-аас ирсэн 27 настай эмэгтэй оюутан 48 хоног эмчлэгдэн дараагийн шатны сувилалд шилжжээ. Харин хоёр дахь иргэн нь 30 настай эмэгтэй, 34 хоног эмчлэгдсэн байна. Тэрбээр Нурсултаны онгоцоор ирсэн ба зургадугаар сарын 11-нд сорьц батлагджээ.
Ийнхүү Монгол Улсад нийт 261 тохиолдол батлагдаж, 209 хүн эдгэрээд байна. Өдгөө коронавирусийн халдвартай 52 хүн байна. Үүнээс 51 нь хөнгөн, нэг хүн хүндэвтэр байгаа аж. Тэдний дунд нэг жирэмсэн эмэгтэй байгааг албаныхан онцолж байна. ХӨСҮТ-д 120 хүн эмчилгээ ажиглалт тандалтад байна. Энэ сарын 15-нд Сөүлээс 428 хүн ирснээс гурвыг нь сэжигтэй гэж үзэн, ХӨСҮТ-д тусгаарлажээ. Эдгээр иргэний сорьцыг өнөөдөр цуглуулах юм.
