Монгол Улсын Ерөнхий сайд У.Хүрэлсүх Байгаль орчин, аялал жуулчлалын яаманд ажиллах үеэрээ 1950-иад оноос хойш Хөвсгөл нуурт живсэн 50 орчим тээврийн хэрэгсэл, техникийг гарган авах, шаардлагатай бол олон улсын байгууллагатай хамтрах үүрэг өглөө.

Мөн Туул голын бохирдлыг багасгахын тулд голын сав газарт түгээмэл тархацтай ашигт малтмал олборлож байгаа аж ахуйн нэгжүүд, Харгиа цэвэрлэх байгууламжтай холбоотой асуудлыг цэгцлэх, Агаарын бохирлыг 80 хувиар бууруулах, ус, хөрсний бохирдлыг бууруулахын тулд Байгаль орчин, аялал, жуулчлалын сайдын ахалдаг Үндэсний хороо, төрийн байгууллага, иргэд, аж ахуйн нэгжүүдийн ажлыг уялдуулахыг сануулсан байна.

Цаашлаад ирэх дөрвөн жилд нийслэлийн агаарын бохирдлыг 80 хүртэл хувиар бууруулах, таваас доошгүй аймагт сайжруулсан түлшний үйлдвэр байгуулах, “Эко жорлон” арга хэмжээг хэрэгжүүлэх, хог хаягдлаас эрчим хүч үйлдвэрлэх, 8000 га талбайг нөхөн сэргээх, ойн талбайн хэмжээг 8,6 хувьд хүргэх зорилт тавьжээ.