“Эрдэнэт үйлдвэр” ТӨҮГ-ын удирдлагуудын ээлжит шуурхай зөвлөгөөн өнөөдөр болж, 10-р сарын үйлдвэрлэлийн төлөвлөгөө бүх үзүүлэлтээр давж биелснийг онцлон, уурхайчдадаа баяр хүргэлээ. Мөн Эрдэнэт үйлдвэрийн баялаг бүтээгчид төлөвлөгөөнөөс 300 мянган тонн хүдэр нэмж боловсруулах даалгаврыг оны эхний 10 сарын байдлаар 126,6 хувиар биелүүлсэн амжилттай ажилласан байна. Энэ үеэр Ерөнхий захирал Засгийн газрын 10-р сарын 28-ны өдрийн хуралдааны тэмдэглэлийг удирдлагуудад танилцууллаа.

Тэмдэглэлд, “Эрдэнэт үйлдвэр” ТӨҮГ-т тогтоосон онцгой дэглэмийн хугацаанд үйлдвэрлэлийн тасралтгүй хэвийн үйл ажиллагааг хангаж, ажлын хариуцлага, сахилга, дэг журмыг сайжруулж, үйлдвэрлэлийн болон эдийн засгийн зорилтуудыг ханган биелүүлж, төлөвлөгөөг давуулан, борлуулалтын орлогыг 109,5 тэрбум төгрөгөөр өсгөж, цэвэр ашгийг 16,8 тэрбум төгрөгт хүргэн улс, орон нутгийн төсөвт 961,8 тэрбум төгрөгийн татвар төвлөрүүлснийг дурджээ. Мөн 2020 оны эхний гурван улирлын байдлаар борлуулалтын орлогыг 98,7 тэрбум төгрөгөөр өсгөж, цэвэр ашгийг 318,7 тэрбум төгрөгт хүргэн улс, орон нутгийн төсөвт 642,4 тэрбум төгрөгийн татвар тус тус төвлөрүүлэн, хөрөнгө оруулалтыг жил тутам нэмэгдүүлэн ажилласныг сайшаан тэмдэглэсэн байна. Шуурхай хуралдаанд Эрдэнэт үйлдвэрийг 2031 он хүртэл хугацаанд хөгжүүлэх үндсэн чиглэлийн хүрээнд хэрэгжиж буй том төслүүд төлөвлөгөөний дагуу амжилттай явагдаж байгааг онцоллоо. Ил уурхайн гадаад цахилгаан хангамжийг сайжруулах ажил, Эмульсийн тэсрэх бодисын үйлдвэрийн барилгын ажил 80 гаруй хувийн гүйцэтгэлтэй хэвийн үргэлжилж байна. Ган бөөрөнцгийн цехийн захиалсан бул нийлүүлэгдсэн учир өнөөдрөөс үйлдвэрлэл хэвийн явагдана. Баримт бичгийн шийдвэрлэлт өссөн зэрэг мэдээлэл удирдах ажилтны шуурхай хуралдаанаар яригдлаа. Үйлдвэрийн газрын цех, нэгжүүдийн өвлийн бэлтгэл ажлын төлөвлөгөө 90-100 хувийн биелэлттэй байна.    

М.ОДГЭРЭЛ
ФОТО: Б.БАТТӨГС