Сар бүрийн эхний өдөр ахмадууд эмийн сангийн үүдэнд үүрээс эхлэн дугаарлаж, сар уух даралтны, зүрхний, үе мөчний гэх хэрэгцээт эмээ базаадаг байв. Настнуудыг чирэгдүүлдэг ч сар уух эмээ хөнгөлөлттэй үнээр авчихдаг байлаа. Харин Эрүүл мэндийн тухай хуульд нэмэлт өөрчлөлт оруулснаар хөнгөлөлттэй эмийг авахад улам дөхөм болж, хар өглөөгүүр дугаарлахгүй, өрхийн эмнэлэгт эмийн жороо бичүүлэх гэж өдрийг барахгүй, дурын эмчээр бичүүлж, дурын эмийн сангаасаа эмээ авдаг болно хэмээсэн билээ.
Ахмадууд ч төр, засагтаа талархаж буйгаа илэрхийлж, Эрүүл мэндийн яамны сайд нь энэ тухай хаа явсан газраа сайрхаж ярьж байв. Гэвч сахил хүртээд шал дордов гэгч л болов.
Энэ тухай УИХ-ын гишүүн Л.Энх-Амгалан бухимдалтайгаар ийн бичжээ. “Бид хөнгөлөлттэй эмэнд зориулдаг 30 тэрбумын төсвийг 60 тэрбум болгон нэмэгдүүлж өгсөн. Цэгцлэх гэж их хичээсэн. Гэтэл амьдралд иргэдийн эм авах үйл явцыг олон шатлалтай болгочихож !!!!!
- Заавал хурууны хээ уншуулж байгаа нь хэвтрийн өвчтэй хүмүүст хүндрэл, чирэгдэл ихтэй.
- Хурууны хээ уншигч нь гацдаг, уншдаггүй олон дахин уншуулдаг. !!!!
- Хөнгөлөлттэй эмийн нэр төрөл цөөрсөн. !!!!
- Эмийг шатлалаар олгодог болсон нь иргэдэд хүндрэл үүсгэсэн.
- Өрхийн эмнэлэг дээрээ очоод даралтын гэх мэт ойр зуурын эмээ бичүүлээд авдаг байсан бол одоо дүүргийн эмнэлэгт дотор, мэдрэл, өвчин намдаах зэрэг эмийг бичдэг, гуравдугаар шатлалын эмнэлэгт элэгний, вирусний гэх мэт эмээ бичдэг болсон. !!!!
Үнэхээр л энэ бүхэн ахмадуудыг бухимдуулж, цөхрөөж байна. Жишээ нь, нэг ахмад дээрх гурван нэр төрлийн эм авъя гэхэд гурван өөр газарт очиж эмээ бичүүлэхээр болгосон байна. Үүнийг дагаад дүүргийн эмнэлгүүд хүнээр дүүрч, цаг авахад хүндрэлтэй байдал үүсчээ. Өмнө нь өрхийн эмнэлэг дээрээ дугаарлаж байгаад өдөртөө авдаг байсан бол одоо гурван өдөр, гурван өөр газарт очиж эмээ бичүүлдэг болсныг Эрүүл мэндийн салбарын шинэчлэл гэнэ үү.
Нөгөөтэйгүүр, хөнгөлөлттэй олгодог эмийн үнийг нэмсэн, тоо ширхэг нь цөөрсөн. Өмнө 20 мянган төгрөгөөс 50 хувь хөнгөлөөд 9.7 мянган төгрөгөөр авдаг байсан даралтны эмийг одоо 27 мянган төгрөгөөс 30 хувь хөнгөлөөд 19 мянгаар авч байх жишээтэй.
Хамгийн хямд 17 мянгын үнэтэй, хайрцагтаа 30 ширхэгтэй эм авахад ердөө 5 ширхэгийг олгодог болсноор өдөртөө нэг ширхэгээр сард 30 ширхэг уух эмийн төлөө зургаан удаа өрхийн эмнэлэг орж бичүүлж, зургаан удаа аптек явах болж байна. Хамгийн гол нь, иргэдийн амьжиргааг хөнгөвчлөх үүднээс үнэтэй эмийг хөнгөлж өгч байгаа. Гэтэл өндөр үнэтэй, баталгаатай, үйлдвэрийн чанар сайтай эмийг хөнгөлөөгүй нь ахмадуудыг бухимдуулах бас нэгэн шалтгаан болж байна. Л.Энх-Амгалан гишүүний “Бид ийм шинэчлэл, ийм өөрчлөлтийг хүсээгүй шүү. Бид үнийг нь нэмээдэх гэж төсөв нэмж өгөөгүй шүү” хэмээн хариуцлагатай хэлснийг дамжуулъя.
У.Тэргэл
Сэтгэгдэл (29)