Улсын онцгой комиссын ээлжит хуралдаан болж, шийдвэрийг нь Засгийн газрын хэвлэл мэдээлэл, олон нийттэй харилцах албаны дарга Ц.Ганзориг танилцууллаа. Тэрбээр, "Зам тээврийн хөгжлийн сайд Л.Халтар, Эрүүл мэндийн сайд Т.Мөнхсайхан нар Сэлэнгэ, Баян-Өлгий аймагт ажиллаад ирсэн. Дээрх газруудад ажилласан ажлын хэсгийн санал дүгнэлтийг өнөөдөр УОК сонслоо. Эрсдлийг үнэлээд ОХУ-тай хиллэдэг Алтанбулаг боомтыг 11 дүгээр сарын 16-ны өдрөөс 2021 оны нэгдүгээр сарын 15-ны өдөр хүртэл хоёр сарын хугацаатайгаар хаах санал гаргаж, Засгийн газарт танилцуулахаар боллоо. Ингэхдээ зөвхөн ачаа тээврийн автомашины хөдөлгөөнийг хязгаарласан. Харин иргэдээ татан авах, зорчих тээврийн хөдөлгөөнийг хаагаагүй гэдгийг онцоллоо.  

Учир нь дээрх боомтоор орж ирсэн 40 орчим жолоочоос коронавирусийн халдвар илэрсэн. Энэ нь эрсдэл өндөр байгааг харуулж байна гэж үзсэн байна.

Түүнчлэн ОХУ-тай хиллэдэг Тэрс, Арцсуурь, Ханх, Ульхан, Эрээнцав, Боршоо гэсэн боомтуудыг мөн арваннэдүгээр сарын 16-наас эхлэн түр хугацаагаар хаах саналыг гаргаж байгаа. Мөн Баян-Өлгий аймгийн Цагааннуур боомтод гаргийн зохицуулалт хийх буюу сар бүрийн 2 болон 4 дэх долоо хоногт ачаа тээвэр нэвтрүүлж байх зохицуулалтыг хийж, шийдвэрлүүлэх саналыг Засгийн газрын хуралдаанд оруулж байгаа юм байна.

Б.Баатар