21 хоногийн тусгаарлалтаас гарсан тээврийн жолооч болон гэр бүлийн хүнээс коронавирусний халдвар илэрсэнтэй холбогдуулан УОК-оос гурав хоногийн хөл хорио тогтоогоод буй. Энэ хугацаанд шинж тэмдэг нь батлагдсан этгээдтэй хавьталд орсон хүмүүсийг эрэн хайх, шинжлэх ажил хийнэ гэсэн м.

Яг энэ эгзэгтэй үеийг ашиглан зарим хүнсний захуудад өргөн хэрэглээний гол бүтээгдэхүүн болох махны үнийг даруй 2000-5000 нэмэгдүүлсэн асуудал үүсээд байна. Тухайлбал, Хүчитшонхор худалдааны төв иргэдийн хөл хөдөлгөөнд дарагдаж, улмаар махныхаа үнийг ийн нэмэгдүүлжээ.

Зөрчлийн тухай хуулийн 10.7 зүйлийн 4.7 дахь хэсэгт "хууль ёсны ашиг сонирхолд харшлах, эсхүл хэрэглэгчийг хууль бусаар хохироох худалдааны арга хэрэглэх үйл ажиллагаа явуулсан нь эрүүгийн хариуцлага хүлээлгэхээргүй бол хууль бусаар олсон хөрөнгө, орлогыг хурааж, учруулсан хохирол, нөхөн төлбөрийг гаргуулж хүнийг хоёр мянган нэгжтэй тэнцэх хэмжээний төгрөгөөр, хуулийн этгээдийг хорин мянган нэгжтэй тэнцэх хэмжээний төгрөгөөр торгоно" гэж заажээ.

Өмнө нь тогтоож байсан хөл хорионы үеэр зохиомол хомсдол үүсгэж улмаар бараа, бүтээгдэхүүний үнийг нэмж борлуулж байсан явдал цөөнгүй гарсан. Энэ удаад ч үргэлжлэх хандлагатай байна. ШӨХТГ-ын дарга Б.Бат-Эрдэнэ та Хүчитшонхор зах руу очиж хүчээ нэг үзүүлээч. Олон нийтийн эрх ашгийг хамгаалж, зоримог хөдлөөч гэж иргэд хүсэж байгааг уламжилъя.

А.Сүх