Коронавирусний халдвар илэрсэнтэй холбоотойгоор тав хоногийн хатуу хөл хорио тогтоогоод байгаа билээ. Энэ хугацаанд онцын шаардлагагүй бол гэрээсээ гарахгүй байхыг Улсын онцгой комиссоос сануулаад байгаа.

Өнөөдрийн байдлаар нийслэлчүүд амны хаалтаа ухамсартайгаар зүүн, хоригийн дүрэм журмыг мөрдөж эхлээд байна.

Гудамжинд хүний хөдөлгөөн багасч, гадуур яваа нь амны хаалттай байгаа нь олзуурхууштай юм.

Гэвч сайны хажуугаар саар гэгчээр хоёр, гурваараа хэлхэлдэн ямар ч зорилгогүйгээр тэнэж яваа улс ч харагдана.

Тиймээс цагдаагийн алба хаагчид,, мэргэжлийн  хяналтын байцаагчид гудамж, талбайд хяналт тавин, иргэдийг гадуур сэлгүүцэхгүй байхыг шаардан ажиллаж байна.

Тэд гадуур яваа иргэдийг ямар шалтгаантайг нь тодруулан, онцын шаардлагагүй бол гэртээ байхыг хүсч, тулж ажиллаж байгаа юм. Мөн хүмүүсийг 1,5 метрийн зайтай явахыг зөвлөж байна. Хатуу хөл хорионы эхний өдөр иргэд хариуцлагатай байж, амны хаалтаа зүүн, зайнаас харилцах гэсэн шйдвэрийг ийнхүү мөрдөж эхэллээ. Автомашины хөдөлгөөн ч эрс багасч, сийрэг байна.

У.Тэргэл