Өвчин зовлон хэлж бус, хийсч ирдэг гэдэг. Дэлхий нийтийг догсолгож буй цар тахал манай орныг ч тойрсонгүй. 2020 оны 11 дүгээр сарын 11. Тусгаарлалтаас гарсан тээврийн жолоочоос халдвар илэрч, Монгол Улс дотооддоо халдвар алдав. Бүх шатны сургууль, цэцэрлэгийн үйл ажиллагааг зогсоож, хатуу хөл хорио тогтоолоо. Учир нь 21 хоногийн тусгаарлалтаас гарсан тээврийн жолоочийн маршрут нэлээд өргөн, хавьтлуудыг олж тогтоох, цар тахлыг хумих зорилгоор ийн арга хэмжээ авав. 

Төр засаг чамгүй л ажиллаж байна. УОК, хууль хүчнийхэн, эмч эмнэлгийн ажилчид гээд эх орныхоо төлөө зүтгэж буй хүмүүст талархмаар. 

Гэтэл монголчуудын хэлдэгээр дайны хажуугаар дажин гэгчээр коронавирусний халдвар илэрсэн тээврийн жолоочийг олон нийт бараг л "булшилж" орхив. Түүнийг санаатайгаар олон нийтийн газраар сэлгүүцсэн, эх орондоо халдвар тараалаа гэгчлэнгээр цахим орчинд түүнтэй холбоотой таагүй мэдээллүүд хөвөрсөөр. Цаашлаад халдвар авсан хүн болгоныг нэр устай нь цоллож, сайн дураараа эл өвчнийг авсан мэтээр үзэн ядах шинжтэй. 

Угтаа хэн ч хайртай дотны хүмүүстээ халдвар тараан эрсдэлд оруулж, эх орондоо тэрслэх санаа өвөртлөхгүй гэдэг нь ойлгомжтой.

Тээврийн жолоочийн ойрын хавьтал болох гэр бүлийнхэн нь ч энэ халдвараар өвчилсөн.

Тэрбээр нэгэн хэвлэлд өгсөн ярилцлагадаа “Би коронавирусээр өвчилсөндөө бус эх орондоо халдвар тараасан гэх аймшигтай мэдээллээс л айж байна. Хэрэв би халдвар авсан гэдгээ мэдсэн бол гэртээ ч очихгүй байсан” хэмээн нулимс дуслуулан ярьсан байсан юм. Үнэхээр сэтгэл өвтгөж, өр зурмаар үг. Үнэхээр тэр гэртээ ч харихгүй байх байсан.

Ийм атал нийгмээрээ халдвар авсан тээврийн жолоочийг элдэвээр хэлж, мэрж байгаа нь үнэхээр харамсалтай.

Бид цөөхүүлээ. Сэжгээр өвдөж, сүжгээр эдгэдэг гэдэг. Монголчууд халдвар авсан Франц улсын иргэнийг хүртэл Анх-Отгон хэмээн нэрийдэж, хурдан этгэхийг ерөөж байсан ард түмэн.

Элэг нэгт монголчууд минь эл өвчнөөр өвчилж, басхүү сэтгэлийн шархтай эмчлүүлж байна. Тиймээс халдвар авсан иргэддээ сэтгэлийн дэм болж бүх нийтээрээ хурдан эдгэхийн ерөөл тавья.

29-хөн настай тээврийн жолооч залуу Энхсаран сувилалд 21 хоног тусгаарлагдахдаа гурван удаа шинжилгээ өгсөн. Хариу нь бүгд сөрөг гарсан учраас тэрбээр гэртээ харих “виз”-ээ өвөртлөөд хоёр жаахан үр, эхнэр дээрээ баярлаад л очсон байж таарна. Бид ч гэсэн түүний оронд байсан бол.

Харин тээврийн жолооч залуу хаанаас хэзээ халдвар авав. Энэ л нийгэмд гол асуулт болох учиртай.

Түүний тусгаарлагдаж байсан Энхсаран сувилал халдвар хамгааллын дэглэм алдсан учраас халдвар тархсан гэж эхний байдлаар үзэж, тус газрын үйл ажиллагааг зогсоож, удирлагуудад нь эрүүгийн хэрэг үүсгээд буй.

Эцэст нь өгүүлэхэд коронавирус цар тахал учраас хүн бүрийн хүчин зүтгэлээр энэ өвчнийг даван туулах учиртай болохоор гэр гэртээ байж, эх орон, элгэн садныхаа дархлааг дэмжиж гэгээлэн сайхан бүхнийг бусаддаа түгээхийг хүсье.

Б.Батчимэг