Дархан-Уул аймгийн онцгой комиссоос мэдээлэл хийлээ.  Тус аймагт ажиллаж буй шуурхай багын ахлагч Ж.Энхбаяр "Өнөөдрийн байдлаар Дархан-Уул аймагт дөрвөн хүнээс PCR шинжилгээгээр халдвар илэрч, ХӨСҮТ-рүү шилжүүллээ. Өчигдөр шөнийн байдлаар гурван хүний шинжилгээний хариу эерэг буюу сэжигтэй гэж гарсан. Одоо төмөр зам дагасан томоохон голомт бий болсон нь тодорхой болж байна. Ялангуяа Дархан-Уул аймагт төмөр замын байгууллагын соёлын болоод спортын арга хэмжээ зохион байгуулагдсан. Дарханд гурав хоног олон зуун хүн ирж найрлаж, урлаг соёлын арга хэмжээ хийсэн.

Ингэхээр төмөр замын систем дагасан томоохон голомт бий болсон байж болзошгүй байна. Тиймээс төмөр замд ажиллаж байгаа албан хаагчидтай холбоотой шинжилгээ тусгаарлалтыг өргөн хүрээнд хийж ажиллаж байна. Одоогийн байдлаар хоёр хүнээс эерэг буюу сэжигтэй тохиолдол илэрсэн. Ингээд төмөр замын систем дотроос таван хүн халдвар авсан  байж болзошгүй гэсэн дүн гарч байна. Нарийвчилсан шинжилгээнд дээж өгсөн. Хэрэв халдвартай нь тогтоогдвол ХӨСҮТ- рүү шилжүүлнэ. Нэгэнт эерэг гарсан тул асуумжуудыг эхлүүлж, маршрут тогтоож байна. Төмөр замын ажилчдыг Дархан зочид буудалд тусгаарлахаар ажиллаж байгаа. Эхний хоёр сэжигтэй тохиолдлыг Комфорт зочид буудалд тусгаарласан. Мөн тэг зогсолт буюу хатуу хөл хориог гурав хоногоор сунгахаар болсон" гэдгийг тодотголоо. 

Б.Баатар