Баянзүрх дүүргийн нутаг дэвсгэрт коронавирусний халдварын сэжигтэй тохиолдол бүртгэгдсэн тул өнөөдрөөс гурван хороонд хэсэгчилсэн хөл хорио тогтоосон. Тодотговол, Баянзүрх дүүргийн дөрөв, ес, 26 дугаар хороонд хэсэгчилсэн хөл хорио тогтоох тухай дүүргийн Засаг даргын захирамж гарсан байна. 

Гэтэл үүнтэй зэрэгцэн дүүргийн нутаг дэвсгэрт бүхэл нь хөл хорио тогтоосон гэх захирамж цахим сүлжээнд тархсан юм. Энэ талаар Баянзүрх дүүргийн Засаг дарга Н.Баярмөнхөөс тодруулахад "Баянзүрх дүүргийн нутаг дэвсгэрт коронавирусний халдварын сэжигтэй тохиолдол бүртгэгдсэн учир дөрөв, ес, 26 дугаар хороонд хэсэгчилсэн хөл хорио тогтоосон. Дүүргийн нутаг дэвсгэрт бүхэлд нь хөл хорио тогтоосон гэх мэдээлэл худал. Зургадугаар хорооны сэжигтэй тохиолдлын хариу сөрөг гарсан. Харин энэ тохиолдол эерэг гарсан бол бүхэлд нь хаах байсан. Цахим сүлжээгээр яваад буй сүүлийн захирамж хуурамч" гэдгийг онцоллоо. 

Б.Баатар