Хүүхдийн 100 мянган төгрөгийг сар бүрийн 20-ны өдөр өгдөг ч цар тахлын энэ цагт наашлуулж олгоно хэмээн иргэдийг хэсэг бужигнуулсан. Тэгснээ болилоо, өгдөг цагтаа л өгнө гэсэн билээ. Харин өнөөдөр буюу 20-ны өдөр хүүхдийн мөнгөө авах гэсэн иргэдийг бухимдуулахад хүргээд байна.

Учир нь, хүүхдийн мөнгөө дансаар авдаг иргэдийн данс руу мөнгийг нь шилжүүлж эхэлсэн бол бэлнээр авдаг иргэдийг банк үйл ажиллагаагаа эхлүүлсэн цагт олгоно хэмээжээ. Үүнээс болж олон хүн бухимдан хүүхдийн мөнгөө авдаг банкныхаа утсыг улайтал залгаж буй ч утсаа ч авахгүй, банкин дээрээ очиж чадахгүй ийм нөхцөл байдалд хүрчээ.

Өнөөдрийн байдлаар хүүхдийн мөнгө авдаг нийт иргэний 40 гаруй хувь нь бэлнээр буюу банкин дээрээ дугаарлан авдаг байна.

Тэдний дийлэнх нь эмзэг бүлгийн, амьжиргааны төвшин доогуур иргэд байдаг аж. Монгол банкны eрөнхийлөгчийн хэлж буйгаар, ирэх даваа гараг буюу арваннэгдүгээр сарын 23-наас банкууд тодорхой салбаруудаа нээхээр халдвар хамгааллын дэглэмээ хангасан. Гэхдээ биднээс шалтгаалахгүй УОК шийдэх учраас зөвшөөрлөө хүлээж байна гэлээ.

Халдвар өдрөөс өдөрт нэмэгдэж буй энэ цагт банкуудыг нээх боломжгүй гэж УОК үзвэл хүүхдийн мөнгөө бэлнээр авдаг иргэд яах вэ. Ямар зохицуулалт хийх вэ.

Олон айл,өрх үүнийг асууж байна. Харин бусдаар банкны цахим гүйлгээ хэвийн яваа аж. Тодруулбал, 73 мянган ПОС машин, бэлэн мөнгөний 4000 АТМ бүгд хэвийн ажиллаж байгаа ба хөл хорио тогтоосноос хойш өдөр бүр дундажаар 27800 иргэн АТМ-ээ 2,6 тэрбум төгрөг авчээ.

У.Тэргэл