2020 оны 11 дүгээр сарын 11-ний өдөр "Энхсаран" сувилалд 21 хоног тусгаарлагдаад гарсан тээврийн жолоочоос коронавирусний халдвар илэрсэн талаар УОК-оос мэдээлсэн. Харин тухайн иргэн дээрх сувиллаас гарахдаа халдвар авсан, "Энхсаран" сувилал халдвар хамгааллын дэглэм алдсан учир манай улс дотооддоо халдварыг алдсан гэсэн урьдчилсан таамаг гараад буй. Тиймээс ч УОК-оос Энхсаран сувиллыг шалгуулах хүсэлтийг цагдаагийн байгууллагад гаргасан талаар бид мэдээлсэн билээ.  

Үүнтэй зэрэгцэн Энхсаран сувиллын эзэн хэн болох, тус газрын ард ХЗДХ-ийн сайд Х.Нямбаатар байдаг гэх мэдээллүүд ч цахим орчинд гарч, газар аваад байгаа билээ.

Энэ талаар Х.Нямбаатар сайд "Цагдаагийн газар өргөдөл гомдлын дагуу ажиллаад өнөөдөр прокурор руу “Энхсаран” сувиллын хэрэг бүртгэл нээх хүсэлтээ явуулсан. Нийт арваад хүн энэ хэрэгт холбогдсон. Бөөнөөрөө сууж лайв хийсэн, нийтийн шүршүүртэй байсан, гаднаас хүнс оруулсан зэргийг тодруулсан.

Намайг энэ сувилалтай холбоод байна. Надад сувилал байтугай түрээсийн нэг өрөө байр ч байхгүй. Харин Сонгинохайрхан дүүргийн иргэн энэ сувиллын эзэн юм билээ" гэсэн юм.

Б.Баатар