Эрүүл мэндийн яамнаас шинэ төрлийн коронавируст халдварын талаар ээлжит мэдээллийг хийж байна.
ХӨСҮТ-ийн Тандалт судлалын албаны дарга А.Амбасэлмаа "2020 оны арванхоёрдугаар сарын 2-ний өглөөний 11 цагийн мэдээллээс хойш ХӨСҮТ-ийн вирус судлалын лаборатори, ЗӨСҮТ-ийн вирус судлалын болон явуулын лабораторид нийт 16599 хүнд PCR шинжилгээ хийсэн. Хавьтал болсон 500 гаруй хүнд шинжилгээ хийхэд 7 хүнээс коронавирус илэрлээ. Тодруулбал Улаанбаатарт нэг тохиолдол бүртгэгдсэн. Энэ хүн нь сүүлийн батлагдсан тохиолдлын ойрын хавьтал байсан. Улаанбаатарын голомтын нийт халдвар 91 тохиолдол болж байна.
Сэлэнгэ аймагт 6 тохиолдол бүртгэгдсэн. Эдгээр нь нэг гэр бүлийн хүмүүс. Нийт батлагдсан 189 тохиолдол боллоо. Харин Орхон, Дархан-Уул, Дорноговь, Говьсүмбэр, Архангайд сүүлийн 24 цагт халдварын тохиолдол бүртгэгдээгүй.
Дотоодын халдвар 376 боллоо. Харин Монгол Улсын хэмжээнд нийт батлагдсан тохиолдол 819 болж, эдгэрсэн хүн 365 боллоо. Халдвартай 445 хүн эмчлүүлж байгаагаас маш хүнд 3, хүнд 5, хүндэвтэр 77, хөнгөн 360 хүн байна" гэв.
Б.Баатар
