Эрүүл мэндийн яамны шуурхай штабаас мэдээлэл хийлээ. Арваннэгдүгээр сарын 29, 30, арванхоёрдугаар сарын нэгний өдөр шинжилгээ өгсөн иргэдийн хариу бүгд гарч дуусчээ. Дээрх өдрүүдэд шинжилгээ өгсөн иргэдийн хариу бүгд сөрөг буюу халдваргүй гэж гарсан байна. Тиймээс эдгээр өдрүүдэд шинжилгээ өгсөн иргэд шалган нэвтрүүлэх постуудаар иргэний үнэмлэхээ үзүүлж, хариугаа шалгуулаад нэвтрэх боломжтой болсон гэдгийг мэдээллээ. Энэ талаар ЭМЯ-ны Төрийн нарийн бичгийн дарга Я.Амаржаргал "Хөдөө орон нутаг болон Улаанбаатар хотод гацсан иргэдийг нутаг буцаах ажил энэ сарын нэгнээс эхэлсэн. Харин шилжилт хөдөлгөөн хийх иргэдийг PCR шинжилгээнд хамрагдсан байх ёстой гэх шаардлага тавьж байсан билээ. Улмаар арваннэгдүгээр сарын 29-ны өдрөөс иргэд 119.mn сайтад бүртгүүлж, шинжилгээ өгч эхэлсэн. Энэ нь 119.mn сайтад ачаалал үүсч, гацсанаас иргэд шинжилгээний хариугаа авч чадахгүй болох, автобуснаасаа хоцрох зэрэг асуудал үүсээд байсан. Тиймээс бид үүрэн холбооны компаниудаар дамжуулан иргэдийн шинжилгээний хариуг зурвасаар илгээж байсан билээ.
Тэгвэл дээрх өдрүүдэд шинжилгээ өгсөн иргэдийн хариуг өнөөдөр шивж дууслаа.
Тодруулбал арваннэгдүгээр сарын 29, 30, арванхоёрдугаар сарын нэгний өдөр шинжилгээ өгсөн иргэдийн хариу бүгд сөрөг буюу халдваргүй гэж гарсан. Тиймээс эдгээр өдрүүдэд шинжилгээ өгсөн иргэд шалган нэвтрүүлэх постуудаар иргэний үнэмлэхээ үзүүлж, нэвтрэх боломжтой. Харин бүртгүүлж, шинжилгээ өгөөгүй иргэд нэвтрэх боломжгүй.
Бид иргэдийн шинжилгээний хариуг шивж, шалган нэвтрүүлэх пост дээр ажиллаж буй хяналтын байгууллага болон цагдаагийн байгууллагад албан бичгээр хүргүүлсэн. Тиймээс дээрх өдрүүдэд шинжилгээ өгсөн иргэд л бичиг баримтаа үзүүлж, тулгаад нэвтрэх боломжтой гэдгийг ойлгох хэрэгтэй.
Эцэг эхтэйгээ хамт амьдардаг 0-12 насны хүүхдүүдээс шинжилгээ авахгүй байх боломжтой гэж үзсэн. Харин эцэг эхээс өөр асран хамгаалагчтай явах тохиолдолд шинжилгээ авна гэдгийг журамд заасан. Шинжилгээний хариу гарсны дараа автобусны тасалбараа худалдан авах нь зүйтэй. Шилжилт хөдөлгөөн хийж байгаа иргэд иргэний үнэмлэхээ заавал биедээ авч явах шаардлагатай гэдгийг дахин анхааруулж байна" гэлээ.
Б.Баатар
